Чăваш Республикин Пуçлăхĕ Михаил Игнатьев Автомобиль тата хулари пассажир транспорчӗн ӗҫченӗсен кунӗ ячӗпе саламлани
Автомобиль тата хулари пассажир транспорчӗн хисеплӗ ӗҫченӗсем тата ветеранӗсем!
Сире професси уявӗ ячӗпе саламлатӑп!
Пирӗн кулленхи пурнӑҫ автотранспортпа тӳрремӗн ҫыхӑннӑ. Груз турттарас ӗҫӗн ытларах пайне вӑл пурнӑҫлать, республикӑра пурӑнакансен 90 ытла проценчӗ пассажир транспорчӗн пулӑшӑвӗпе куллен усӑ курать.
Регионти автотранспорт предприятийӗсем техника тӗлӗшӗнчен пуянланаҫҫӗ. Автобус паркне тӑтӑшах ҫӗнетсе пыратпӑр, «Пурӑнма лайӑх хутлӑх» программӑна пурнӑҫланӑ май инвалидсене тата халӑхӑн питех тухса ҫӳреймен ушкӑнне турттарма транспорт туянатпӑр.
Раҫҫей Промышленноҫпа суту-илӳ министерстви пулӑшнипе Чӑваш Ен автотранспорта газпа ӗҫлемелле тӑвас енӗпе пилотлӑ проект пурнӑҫлакан субъектсен йышне кӗчӗ. Кӑҫал республикӑра ҫут ҫанталӑк газӗпе ӗҫлекен вуншар ҫӗнӗ автобус рейса тухрӗ. Ҫавнашкал автотранспорт шутне ӳстерни экологи ыйтӑвӗсене татса пама тата транспортпа усӑ курнӑшӑн тӳлемелли хака палӑрмаллах чакарма пулӑшать.
Республикӑн социаллӑ пурнӑҫпа экономика вӑй-хӑвачӗ ытларах чухне транспорт комплексӗ мӗнлерех шайра пулнинчен килет. Ҫавӑнпа та транспорт тытӑмне аталантарасси тата ҫул ҫӳрев хӑрушсӑрлӑхне тивӗҫтересси патшалӑхӑн тӗп ҫул-йӗрӗсен шутӗнче.
Паян автотранспорт отраслӗн ертӳҫисемпе ӗҫченӗсен умӗнче халӑха транспорт пулӑшӑвӗпе пӗр кӑлтӑксӑр тивӗҫтерессипе, пассажирсем тата грузсем турттарас ӗҫӗн хӑрушсӑрлӑх шайне ӳстерессипе, аварисен шутне чакарассипе, кӳрекен пулӑшу ӗҫӗсен пахалӑхне лайӑхлатассипе ҫыхӑннӑ тӗллевсем тӑраҫҫӗ.
Сире пысӑк пӗлтерӗшлӗ мӗнпур тӗллеве пурнӑҫлама, ҫавӑн пекех ҫирӗп сывлӑх, ырлӑхпа тӗреклӗх, ҫул ҫинче ӑнӑҫу сунатӑп!
Чӑваш Республикин
Пуҫлӑхӗ М. Игнатьев