Чăваш Республикин Пуçлăхĕ Михаил Игнатьев Вӗрентекенсен кунӗ ячӗпе саламлани
Чӑваш Енӗн хисеплӗ педагогӗсем!
Уяв ячӗпе пӗтӗм чунтан саламланине йышӑнсамӑр!
Вӗрентекен профессийӗ вӑл – питӗ пысӑк пӗлтерӗшлӗ те яваплӑ тивӗҫ. Ҫамрӑксем мӗнлерех пуласси, вӗсем хӑйсен вӑй-халӗпе туллин усӑ курма пултарасси тата пурнӑҫра хӑйсен вырӑнне тупасси ытларах чухне педагогика ӗҫченӗсен пултарулӑхӗпе професси ӑсталӑхӗнчен килет.
Чӑваш Енри 475 шкулта 11 пин ытла вӗрентекен вӑй хурать, вӗсем 127 пин шкул ачине пӗлӳ параҫҫӗ. Чӑваш Республикинчи учительсем инновациллӗ вӗрентӳ ӗҫне хастарлӑн хутшӑнаҫҫӗ – регионта педагогикӑри ҫӗнӗлӗхсене ҫул парас тӗлӗшпе 120 ытла пилот площадки ӗҫлет.
Вӗрентекенсен пултарулӑхри хастарлӑхне конкурссем йӗркелесе, грантсемпе стипендисен тытӑмӗ урлӑ хавхалантараҫҫӗ. Кашни ҫулах учительсен 40 процентне яхӑн йышӗ тӗрлӗ конкурса хутшӑнать. Юлашки ҫулсенче ҫӗршер педагогика ӗҫченӗ патшалӑх пулӑшӑвне илнӗ.
Республикӑри педагогсен ҫӳллӗ шайри ӑсталӑхне пула пӗтӗм Раҫҫейри шкул ачисен олимпиадин юлашки тапхӑрӗнче ҫӗнтерӳҫӗ тата призер ятне тивӗҫнӗ вӗренекенсен шучӗ икӗ хута яхӑн ӳсрӗ. Чӑваш Енри шкулсенчен вӗренсе тухакансен пӗрлехи патшалӑх экзамен кӑтартӑвӗсем Раҫҫейри вӑтам кӑтартуран пӗтӗм предметпах пысӑкрах, пирӗн шкулсем Раҫҫейри чи лайӑх пӗлӳ ҫурчӗсен йышне кӗреҫҫӗ.
Сире ӗҫри хастарлӑхӑршӑн, хӑвӑр тивӗҫӗре чунтан парӑнса пурнӑҫланӑшӑн, ачасене тарӑн пӗлӳ илме пулӑшнӑшӑн, вӗсене хӑвӑрӑн чӗре ӑшшине панӑшӑн чун-чӗререн тав тума ирӗк парсамӑр.
Пурсӑра та пӗтӗм чунтан профессире ҫӗнӗ ҫитӗнӳсем тума, вӗренекенсемпе пӗрне-пӗри ӑнланма, ӗҫӗрпе кӑмӑллӑ пулма, ҫирӗп сывлӑх, телей тата ырлӑх сунатӑп!
Чӑваш Республикин Пуҫлӑхӗ М.Игнатьев