Чăваш Республикин Пуçлăхĕ Михаил Игнатьев Шалти ӗҫсен органӗсен ӗҫченӗсен кунӗ ячĕпе саламлани
Шалти ӗҫсен органӗсен хисеплӗ ӗҫченӗсем тата ветеранӗсем!
Сире професси уявӗпе саламлатӑп!
Полицейскисен умӗнче пысӑк пӗлтерӗшлӗ тӗллев тӑрать – обществӑри йӗркелӗхе тата патшалӑх хӑрушсӑрлӑхне тивӗҫтересси. Правӑна сыхлакан органсене шӑпах ҫавӑнпа ӗнтӗ ҫӗршыва чунтан савакан чӑн-чӑн патриотсем ӗҫлеме килеҫҫӗ.
Ҫакна кӑмӑлтан палӑртма пултаратӑп: Шалти ӗҫсен министерствипе ведомствӑсем хушшинче тачӑ ҫыхӑнса ӗҫлесси пирӗн паян лайӑх шайра йӗркеленнӗ. Пӗр-пӗринпе ҫакӑн пек усӑллӑ хутшӑнса ӗҫленине пула криминаллӑ лару-тӑрӑва ҫирӗппӗн асӑрхаса тӑма, социаллӑ-политикӑпа тата тӗнпе ҫыхӑннӑ хирӗҫӳллӗ лару-тӑруран сыхланма май килет.
«Хӑрушлӑхсӑр хула» программа шайӗнче Чӑваш Ен территорийӗнчи халӑх йышлӑ пулакан вырӑнсенче паян 10 пин ытла видеосӑнав камери вырнаҫтарнӑ. Республика тӗп хулинче вара хальхи вӑхӑтра вӗренӳ учрежденийӗсене тата картишсене компактлӑ хатӗрсемпе тивӗҫтерес ӗҫ пырать.
Правӑна сыхлакан органсен ӗҫ-хӗлӗнче ҫамрӑксемпе ӗҫлесси те паллӑ вырӑн йышӑнса тӑрать. «Полици тата ачасем», «Ачасен сывлӑхӗпе хӑрушсӑрлӑхӗшӗн», «Полици ачалӑх хуралӗнче», «Питӗ лайӑх полицейски» акцисем тӑтӑшах иртеҫҫӗ. Ҫакӑ ҫитӗнекен ӑру ҫине палӑрмаллах витӗм кӳрет: Чӑваш Енре сывӑ пурнӑҫ йӗркине тата спорта кӑмӑллакансен шучӗ ҫулран-ҫул ӳсет, ҫамрӑксен кӑсӑкланӑвӗсем те улшӑнаҫҫӗ.
Пирӗн регионта полицейскисем пӗлтерӗшлӗ мӗнпур мероприятиех хутшӑнаҫҫӗ. Ытларах чухне ҫавна пула республика Европа тата тӗнче шайӗнчи спорт ӑмӑртӑвӗсене чи ҫӳллӗ шайра йӗркелесе ирттерет, сумлӑ хӑнасене йышӑнать, республикӑра пурӑнакансен тата хӑнасен социаллӑ кӑмӑл-туйӑмне лайӑхлатма пулӑшакан массӑллӑ уявсем йӗркелет.
Шалти ӗҫсен министерствин ӗҫченӗсене, ветеранӗсене тивӗҫе тата присягӑна чунтан парӑннӑшӑн, ҫынсемпе евӗк пулнӑшӑн, ӗҫри ӑсталӑхшӑн тата тӗллевсене пурнӑҫланӑ чухнехи оперативлӑхшӑн, паттӑрлӑхпа хӑюлӑхшӑн пӗтӗм чунтан тав тӑватӑп.
Сире чун-чӗререн ҫирӗп сывлӑх, ҫӗкленӳллӗ кӑмӑл-туйӑм тата хӑвӑр вӑя шанма сунатӑп!
Чӑваш Республикин
Пуҫлӑхӗ М.Игнатьев