Чăваш Республикин 2014 çулхи социаллă пурнăçпа экономика аталанăвĕн кăтартăвĕсене ертӳçĕсем хаклани
Чăваш Республикин Пуçлăхĕн советникĕ, Патăрьел районĕн пуçлăхĕ Михаил Петров:
"Пурнăçра яланах малашлăх çинчен шутласа ĕçлемелле. Чăваш Республикин 2014 çулхи çитĕнĕвĕсемпе паллашнă май, республикăра, çавăн пекех пирĕн Патăрьел районĕнче те чăнах та ӳсĕмсем пуррине куртăмăр. Çак çитĕнӳсене тунă çĕрте Чăваш Республикин Правительствин тӳпи пысăк тесе каласшăн эпĕ.
Унчченхи вăхăтра: «Кредит нумайрах илмелле, ĕçлемелле,» – теттӗмӗрччӗ. Паян вара Михаил Васильевич çакăн пек палӑртрӗ: «Кредит çине анчах шанмалла мар, хамăр вăй çине таянса ĕçлемелле. Ял хуçалăх сферинче ĕçлекенсем малтанхи пекех ҫӑмӑллӑхлă кредитсемпе усă курма пултараççĕ", - терĕ.
Чăваш Республикинчи Муниципалитет пĕрлешĕвĕсен канашĕн ĕç тăвакан директорĕ Станислав Николаев:
"Паянхи Чăваш Республикин Министрсен Кабинечĕн анлă ларăвĕнче республика пĕлтĕрхи çула мĕнле вĕçленине, еплерех йывăрлăхсемпе тĕл пулнине, 2015 çула мĕнле кăтартусемпе кĕтсе илмеллине тĕплĕн пăхса тухрĕç. Çакă шанчăк çуратать. «Чăнах та, паян лару-тăру çăмăлах маррине пурте пĕлеççĕ. Палăртса хăвармалла: Раççейӗн çĕнĕ историйĕнче ку пĕрремĕш экономика кризисĕ мар ĕнтĕ. Çак лару-тăруран мĕнле тухасси, паллах, чи малтан пирĕн хастарлăхран, эпир резервсем тупма пĕлнинчен, тăкаксене сахаллатса ĕçлеме пултарнинчен килет. Муниципаллă районсенче пĕчĕк предприятисене аталантарма майсем туса памалла. Чи малтан пуçаруллă, ĕçлес текен çынсене палăртмалла. Енчен те эпир вĕсене ĕçре пулăшса, йĕркелесе пырсан, тупăшĕ те республика экономикин аталанăвĕнче хăйĕн вырăнне тупĕ», – тесе питех те тĕрĕс палӑртрĕ Михаил Васильевич. «Йывăрлăхсене пĕтерес тесен пĕрлешсе ĕçлемелле, резервсене явӑҫтарса малалала аталанма майсем тупмалла. Цифрăсене хăвăрах куратăр – вĕсем пĕлтĕрхинчен пысăкрах, çакă республика иртнӗ çул пĕр вырăнта тăманнине пĕлтерет. 2015 çулта та витӗмлӗ кăтартусем тума пултарасса эпир шанатпăр», – терĕ тата Чăваш Ен Пуçлăхĕ.
Кунта тепĕр саманта палăртса хăвармалла: паянхи ҫӑмӑлах мар тапхăрта та социаллă пурнăç условийӗсен шайне ӳстерсе пыни, ун çине уйрăмах тимлĕн пӑхни куç кӗрет. Пирĕн республика хальхи ҫӑмӑлах мар вӑхӑтра та Раççей Федерацийĕнче эффективлă ĕçлекен малти регионсен шутĕнче.