Чăваш Республикин Пуçлăхĕ Михаил Игнатьев Уголовлӑ айӑплава пурнӑҫлакан тытӑмӑн ӗҫченӗсен кунӗ ячӗпе саламлани
Чӑваш Енри уголовлӑ айӑплава пурнӑҫлакан тытӑмӑн хисеплӗ ӗҫченӗсем тата ветеранӗсем!
Сире професси уявӗпе саламлатӑп!
Сирӗн ӗҫӗр пысӑк яваплӑхпа ҫыхӑннӑ, ӑна пурнӑҫлама ҫӳллӗ шайри ӑсталӑх кирлӗ, вӑл служба ӗҫ-хӗлӗн йӗркисемпе мелӗсене тӑтӑшах лайӑхлатса пыма хистет.
Раҫҫейӗн айӑплава пурнӑҫлакан федераци службин Чӑваш Республикинчи управленийӗн учрежденийӗсем судпа айӑпланнӑ ҫынсене тӳрленме пулӑшас тата психологи пулӑшӑвӗ парас ӗҫе тӗллевлӗн пурнӑҫласа пыраҫҫӗ, республикӑри ӗҫ тӑвакан влаҫ органӗсемпе тата вырӑнти хӑй тытӑмлӑх органӗсемпе, предприятисемпе, общество организацийӗсемпе тата тӗн конфессийӗсемпе тухӑҫлӑн ҫыхӑнса ӗҫлеҫҫӗ.
Республикӑра «социаллӑ лифт» системи ӑнӑҫлӑн пурнӑҫланать. Судпа айӑпланнӑ ҫынсене ӗҫе вырнаҫтарассипе ҫыхӑннӑ ҫивӗч ыйтусене татса парасси ҫине кӑна мар, ҫавӑн пекех айӑплава тӳссе ирттермелли майсене лайӑхлатасси, медицина пулӑшӑвӗн пахалӑхне ӳстересси, Чӑваш Енри юсану учрежденийӗсенче айӑплав иртекен ҫынсене тулли вӑтам тата аслӑ пӗлӳ илме пулӑшасси ҫине те пысӑк тимлӗхпе пӑхатпӑр.
Сире служба тивӗҫне тӳрӗ кӑмӑлпа пурнӑҫланӑшӑн тав тӑватӑп. Пурсӑра та ҫирӗп сывлӑх, хастар кӑмӑл, шанӑҫлӑх тата ырлӑх сунатӑп!
Чӑваш Республикин Пуҫлӑхӗ М.Игнатьев