Чăваш Республикинчи патшалăх влаçĕн органĕсемпе вырăнти хăй тытăмлăх органĕсен хĕллехи Спартакиади пулса иртнĕ
Нарăс уйăхĕн 28-мĕшĕнче Шупашкар районĕнчи «Улăп» сывлăхпа спорт центрĕ çумĕнчи стадиона халăх йышлăн пухăннă. Кунта Чăваш Республикинчи патшалăх влаçĕн органĕсемпе вырăнти хăй тытăмлăх органĕсен хĕллехи Спартакиади пулса иртнĕ. Чăваш Республикин Пуçлăхĕн Администрацийĕн Ертӳçи Юрий Васильев спортсменсене Спартакиада шучĕпе йĕлтĕрпе чупассипе ăмăртусем уçăлнă ятпа хĕрӳллĕн саламланă, спорт ăмăртăвĕсенче пысăк çитĕнӳсем тума сĕннĕ, пурне те савăк кăмăл-туйăм суннă. Спартакиада физкультурăпа спорта юратакансен, сывă пурнăç йĕркине тытса пыракансен йышне ӳстерме пулăшнине палăртнă. Хыççăн Чăваш Республикин Пуçлăхĕн Администрацийĕн Ертӳçи Юрий Васильев Сочире иртнĕ хĕллехи Олимп тата Паралимп вăййисене ирттерме пысăк витĕм кӳнисене - Шупашкар хула пуçлăхне Леонид Черкесова тата Шупашкар район администрацийĕн пуçлăхне Георгий Егорова - Раççей Федерацийĕн Пезиденчĕн Хушăвĕпе килĕшӳллĕн панă медальпе наградăланă. Нарăс уйăхĕн 18-мĕшĕнче пăшалпа тĕл перессипе ирттернĕ спорт ăмăртăвĕсен çĕнтерӳçисене дипломсем парса хавхалантарнă. Хĕрӳ тупăшусенче малти вырăна Чăваш Республикин финанс министерстви тухнă, иккĕмĕш вырăна ял хуçалăх министерстви, виççĕмĕшне - Чăваш Республикин Пуçлăхĕн Администрацийĕн команди тивĕçнĕ. Йĕлтĕрпе чупассипе ăмăртусем VIP чупуран пуçланнă, хыççăн командăсем ăмăртăва тухнă. Эстафетăра пилĕк çын ăмăртнă: виçĕ арçынпа икĕ хĕрарăм. Арçынсем икĕ çухрăм, хĕрарăмсем пĕр çухрăм та икçĕр метр чупнă. XIV-мĕш Спартакиадăна пурĕ 1000 яхăн спорта юратакан хутшăннă, çĕнтерӳçĕ ятне ял хуçалăх министерстви тивĕçнĕ. Спартакиада çулталăк тăршшĕпех иртет. Хĕллехи тапхăрта – йĕлтĕрпе чупассипе тата пăшалтан перессипе, çуркунне – шашка, шахмат, сĕтелçи теннис, волейбол тата мини-футбол, çулла – пĕрлештернĕ эстафета, мини-футбол (финал), канат туртассипе, кĕркунне – волейбол (финал), ишессипе, стрит-бол (финал), дартс вăййисем енĕпе.