Чăваш Ен Пуçлăхĕ Михаил Игнатьев ĕçлĕ визитпа Крым Республикинче пулнă май, Михаил Павлович Бочкарёв вăрçă ветеранĕ, контр-адмиралпа тĕл пулнă
Нарăс уйăхĕн 27-мĕшĕнче Чăваш Ен Пуçлăхĕ Михаил Игнатьев ĕçлĕ визитпа Крым Республикинче пулнă май, вăл Чăваш Республикинчи Пăрачкав районĕнче çуралса ӳснĕ Михаил Павлович Бочкарёв вăрçă ветеранĕ, контр-адмирал патĕнче хăнара пулнă. Паттăр салтак 9 орденпа 41 медале тивĕçлĕ пулнă. Чăваш Енре ӳссе ҫитĕннĕ Тăван çĕршывӑн Аслă вăрçин ветеранне Михаил Игнатьев вăрăм ĕмĕрлĕ кун-çул суннă, паттăрла ĕçсемшӗн чĕререн тав тунă. «Ялтан тухнă çамрăк салтакăн паттăрла ĕçĕсем паянхи çитĕнекен ăрушăн тĕслĕх вырăнĕнче пулмалла. Фашистла Германие çĕнтерессине çывхартас ĕçе миллионшар çын хăй вăйĕ ҫитнĕ таран тӳпе хывнӑ, вĕсенчен нумайăшĕ çĕршывăмăрăн ирĕклĕхĕпе никама пăхăнманлăхне сыхласа хăварассишĕн пурнăçне панă. Паян çитĕнекен ăрăвăн çĕршыв историне пĕлсе ӳсмелле, Михаил Павлович Бочкарёв паттăрлăхне тĕслĕх вырăнне хумалла», - тесе каланă Михаил Игнатьев. Нумаях пулмасть 96 çул тултарнă Михаил Павлович Бочкарёв Чăваш Ен Пуçлăхне ырласа тав тунă. Тӗлпулу вăхăтĕнче сумлă ветеран вăрçăн тумхахлă çулĕсем пирки каласа кăтартнă, кулленхи пурнăçĕпе паллаштарнă. Михаил Павлович хăй çинчен çырнă аса илӳ кĕнекисене Михаил Игнатьева парнеленĕ. Г.В. Плеханов ячĕллĕ Раççей экономика университечĕн Севастопольти филиалĕнче Михаил Игнатьев чăваш ентешлĕхĕпе тата казаксен представителĕсемпе тĕл пулнă. Регионсем хушшинчи культурăна аталантарассипе, истори еткерлĕхне сыхласа хăварассипе çыхăннă ыйтусем çине обществăна тимлĕрех пăхтарас, çамрăксене воспитани парас ĕçре çĕршывăмăрăн культурин пĕлтерĕшне ӳстерес тĕллевпе курăмлă ĕçсем тунăшăн Севастопольти ентешлĕхӗн хастар çыннисене: Ираида Бугорскаяна, Любовь Тавлуя тата Анна Тимофеевăна тав çырăвĕсем парса хавхалантарнă. Тĕплĕнрех