Мартăн 2-мĕшĕнче Чăваш Республикин Пуçлăхĕ Михаил Игнатьев республикăра пурăнакан Аслă Отечественнăй вăрçă ветеранĕсене - 36 çынна «1941-1945 çулсенчи Аслă Отечественнăй вăрçăра çĕнтерÿ тунăранпа 70 çул» юбилей медалĕсем панă. Республика Пуçлăхĕ хăйĕн сăмахĕнче Çĕнтерÿ кунĕ çынсен чĕрисенче уйрăмах паллă вырăн йышăннине палăртнă.

- Пĕтĕм ăрусене пĕрлештерекен çутă уяв. Пирĕн халăх, çамрăккисенчен пуçласа аслă çулхисем таранах, Тăван çĕршыва юратни, паттăрлăх, пĕрле, пĕр шухăшлă пулни кирек епле тăшмана та çĕнтерме пултарнине кăтартрĕ. Ĕçе юратакан, чун-чĕреллĕ чăваш халăхĕ Аслă Çĕнтерÿшĕн вăй-халне шеллемерĕ, - тенĕ республика Пуçлăхĕ.

Михаил Игнатьев ветерансем çулленех сахалланса пынăшăн пăшăрханнине палăртнă. Хальхи вăхăтра Чăваш Енре Аслă Отечественнăй вăрçа хутшăннисем 1550 çын юлнă, тыл ĕçченĕсем - 22 пин, тăлăх арăмсем - 3 пин ытла, «Блокадăллă Ленинградра пурăнакан» паллăна тивĕçнисем - 51, фашизм тĕрминче пулнă 82 çын.

- Кам Çĕнтерĕве туптанă, ун пеккисем çине патшалăхăн, обществăн пысăк тимлĕх уйăрмалла. Тăван çĕршывшăн хăйсен пурнăçне панисене асра тытмалла. Вĕсен тĕслĕхĕпе çамрăк ăрăва воспитани памалла, çĕршыва шанчăклă хураллама вĕрентмелле, - палăртнă Чăваш Ен Пуçлăхĕ.

Çĕнтерÿ фронтра кăна мар, тылра та туптаннă. Пирĕн ентешсем çапăçу хирĕнчисене пулăшас тесе пысăк тÿпе хывнă. Вĕсенчен пĕри - Элĕк салинче пурăнакан Васса Ивановна Иванова. Вăрçă ветеранне паттăрлăхĕпе хастарлăхне палăртса «1941-1945 çулсенчи Аслă Отечественнăй вăрçăра Çĕнтерÿ тунăранпа 70 çул» юбилей медалĕ панă. Васса Иванова 1927 çулхи ноябрĕн 12-мĕшĕнче Пĕчĕк Йăлкăш ялĕнче çуралнă. Йăлкăш шкулĕнчен (1942 çул), Элĕкри вăтам шкултан (1945 çул) вĕренсе тухнă. Унăн çамрăклăхĕ йывăр çулсенче иртнĕ. Вăл ял çыннисемпе пĕрле колхоз уйĕсенче ĕçленĕ: сухаланă, акнă, тырă-пулă пухса кĕртнĕ. Пĕтĕм ĕçе алă вăйĕпе тунă. Выçăллă-тутăллă вăй хунă. Çĕнтерĕве çывхартас тесе фронта тырă ăсатнă. Васса Ивановна вăрман каснă, торф кăларнă çĕрте те ĕçленĕ. Вăл чи йывăр ĕçсенчен хăраман.

Вăрçă хыççăнхи çулсенче звеньевойра, бригадирта, сĕт-çу фермин заведующийĕн- че вăй хунă. Вăл 1950-1960 çулсенче Йăлкăш ял Совечĕн секретарĕ, 1960-1964 çулсенче - Йăлкăш ял Совечĕн председателĕ, 1965-1971 çулсенче районти ĕççыннисен депутачĕсен Совечĕн ĕçтăвкомĕн секретарĕн должноçне йышăннă.

1971-1985 çулсенче - районти социаллă пулăшу пайĕн заведующийĕ.

Ăна Аслă Отчественнăй вăрçă çулĕсенче лайăх ĕçленĕшĕн «1941-1945 çулсенчи Аслă Отчественнăй вăрçă вăхăтĕнче хастар ĕçленĕшĕн», «В.И.Ленин çуралнăранпа 100 çул тултарнă ятпа хастар ĕçленĕшĕн» медальсем, юбилей медалĕсем парса чыс тунă. Вăл «Ĕç ветеранĕ» ята тивĕçнĕ.