Чăваш Ен Пуçлăхĕ Михаил Игнатьев хăйĕн мăшăрĕпе Лариса Юрьевнăпа Пĕтĕм тĕнчери Хĕрарăмсен кунне халалланă «Юрату сассисем» ятлă савӑнӑҫлӑ мероприятие хутшăннă
Пуш уйăхĕн 5-мĕшĕнче Чăваш Ен Пуçлăхĕ Михаил Игнатьев хăйĕн мăшăрĕпе Лариса Юрьевнăпа Пĕтĕм тĕнчери Хĕрарăмсен кунне халалланă «Юрату сассисем» ятлă савӑнӑҫлӑ мероприятие хутшăннă. Ӑна Чăваш патшалăх оперăпа балет театрĕнче йĕркеленĕ. Савăнăçлă уяв каçне Чăваш Республикин Министрсен Кабинечĕн Председателĕн çумĕ – сывлăх сыхлавĕпе социаллă аталану министрĕ Алла Самойлова, республикăри Хĕрарăмсен канашĕн председателĕ Ольга Зайцева тата ытти официаллă çынсем хутшӑннă. Уява пӗтӗмпе 800 пике – паллă врачсем, вĕрентекенсем, культурăра, спортра вăй хуракансем, промышленноçпа транспорт тытăмĕнче, ял хуçалăхĕнче тата ытти çĕрте тăрăшакансем пуҫтарӑннӑ. Палăртма кăмăллă: асӑннӑ уяв каҫӗнче хĕрарăмсен юхăмне аталантарма витĕм кӳрекен хастар та пултаруллă ветерансем те пулнӑ. «Пурнăçра мĕн çутти тата лайăххи пур, çавă веçех хĕрарăм сăнарĕнче палăрать. Хӳхĕм хĕрупраç мĕн авалтанах сăпайлă та тимлӗ, ĕçчен те тăрăшуллă пулнипе, ачашлăхĕпе тата ырă кăмăлĕпе уйрăлса тăрать. Çак паха енсем хĕрарăмсене кил-çурта хăтлăрах тума, çемье вучахӗн ăшшине сыхласа упрама, ачасене ăс парса ӳстерме, мĕнпур ĕçре çитĕнӳ тума пулăшса пыраççĕ», - тесе пӗлтернӗ хăйĕн салам сӑмахĕнче Чăваш Ен Пуçлăхĕ Михаил Игнатьев. Республика Правительстви ачалăхпа амăшлăха пулăшасси, çемье хаклăхĕсене çирĕплетесси çине уйрăмах пысăк тимлĕхпе пăхать. «Çамрӑк ача амăшĕсем çурату сертификачĕ, пособисем тата амăшĕн капиталĕ евӗр паракан укçа-тенкĕ пулăшăвне илеççĕ, патшалăх кӳрекен ытти пулăшу тĕсĕпе усă кураççĕ. Ача амăшĕпе ача сывлăхне сыхлакан тытăмра медицинăн малта пыракан технологийĕсем хастарлăн ĕçе кĕреççĕ. Ача сачĕсем тăвасси кал-кал пурнăçланать, çакă ача амăшĕсене декрет отпускĕ хыççăн ĕçе часрах тухма май парать», - палӑртнӑ республика Пуçлăхĕ. Уяв каçĕнче хисепе тивĕçнисене яланхи пекех наградăсем парса хавхалантарнă. Чăваш Республикинчи Хĕрарăмсен канашĕн председателĕ Ольга Зайцева Чăваш Ен Пуçлăхне Михаил Игнатьева чĕререн тав тунă. «Патшалăх хĕрарӑмсене ыранхи куна шанса пурăнма хавхалантарать, Чăваш Енре нумай ачаллӑ ҫемьесен шучӗ ӳсет, пурнăç условийӗ ырă енне улшăнса пыни пурне те йӗркеллӗ ĕçлесе пурăнма вăй кӳрет», - тенĕ Ольга Зайцева. Паянхи пикесем пурнӑҫа тивӗҫлипе тытса пыма пулӑшакан ҫирӗп тĕрев йĕркелеççĕ. Хӑйсен пĕлĕвĕпе, пултарулăхĕпе, ĕçченлĕхĕпе пурнăçăмăра илемлĕрех, пуянрах, хăтлăрах тума тăрăшаççĕ. Çав вăхăтрах вĕсем илĕртӳлĕхе, чун ăшшине, ырăлăха çухатмасăр юратнă амăшĕсем, шанчăклă мăшăрсем шутланаççĕ, тăван кил ăшшине упрама пĕлеççĕ. Уяв каçĕ «Юрату сассисем» ятлă пысăк концертпа вĕçленнĕ. Артистсен илĕртӳллĕ сассисем пурин кăмăлне те çĕклентернӗ, тыткăна илнĕ. Театр залĕнче уява пынисем «Чăваш ҫи-пуҫӗ», «Чăваш Енӗн паллă хĕрарăмĕсем – Тăван çĕршывăн Аслă вăрçин ветеранĕсем» ятлă куравсемпе паллашнă. Тĕплĕнрех