Чăваш Республикин Пуçлăхĕ Михаил Игнатьев Чӑваш чӗлхи кунӗ ячӗпе саламлани
Хаклӑ ентешӗмӗрсем!
Сире Чӑваш чӗлхи кунӗ ячӗпе саламлатӑп!
Эпир чаплӑ культура ӗҫченӗ тата чӑваш халӑхне ҫутта кӑларакан Иван Яковлевич Яковлев ҫуралнӑ кун ҫулсерен паллӑ тӑвакан ҫак уяв хӑйне евӗрлӗ пӗрлештерекен витӗмпе палӑрса тӑрать.
Чӑваш Енре 2015 ҫула Константин Ивановӑн, илемлӗ чӑваш литературин никӗслевҫи шутланакан аслӑ сӑвӑҫӑн, ҫулталӑкӗ тесе пӗлтернӗ. Ҫак йышӑну обществӑна тӑван чӗлхепе литературӑна сыхласа упрас ыйтусем ҫине тимлӗрех пӑхма хистет. Иван Яковлевич Яковлев кун пирки ҫапла палӑртнӑ: «Халӑхӑн ӑс-тӑнӗпе унӑн пӗтӗм тӗнче курӑмне тӑван чӗлхе чун парать. Тӑван чӗлхесӗр чӑн-чӑн пӗлӳ ҫук».
Пирӗн, чӑваш чӗлхине сыхласа хӑварса, культурӑпа чӗлхе пуянлӑхне ҫитес ӑрусем туллин йышӑнса юлассине тивӗҫтермелле. Ҫав хушӑрах ҫамрӑксене тӑван чӗлхене хисеплеме вӗрентнипе пӗрлех, вӗсене ытти халӑхсен чӗлхипе йӑли-йӗркине те сума сума хӑнӑхтармалла, обществӑра ӑс-хакӑла тата кӑмӑл-сипете ҫирӗплетме пулӑшмалла.
Тӑван чӗлхене пуянлатас тата халӑх хушшинче сарас тӗлӗшпе ырми-канми тӑрӑшакан чӗлхеҫӗсемпе чӗлхе тӗпчевҫисене, тӑван сӑмахпа литературӑна вӗрентекенсене, ҫыравҫӑсемпе журналистсене уйрӑммӑн тав тӑватӑп. Пурне те ҫирӗп сывлӑх, пултарулӑхра хавхалану, иксӗлми вӑй-хал, ырӑ пуҫарусенче ӑнӑҫусем, ырлӑхпа телей, Чӑваш Республикинче пурӑнакансен ырлӑхӗшӗн ҫӗнӗ проектсем пурнӑҫлама сунатӑп!
Чӑваш Республикин Пуҫлӑхӗ М. Игнатьев