Чăваш Ен Пуçлăхĕ Михаил Игнатьев Шупашкарти 5-мĕш Гимназирен вĕренсе тухакан 11-мĕш класс ачисене вĕренӳ çулĕ вĕçленнĕ ятпа саламланă
Çу уйăхĕн 23-мĕшĕнче Чăваш Ен Пуçлăхĕ Михаил Игнатьев Шупашкарти 5-мĕш Гимназирен вĕренсе тухакан 11-мĕш класс ачисене вĕренӳ çулĕ вĕçленнĕ ятпа саламланă. Уяв мероприятине Шупашкар хула пуçлăхĕ Леонид Черкесов хутшăннă. Вĕренекенсене юлашки шăнкăрав вĕсен малашнехи пурнăç çулĕ çине тăма аса илтернине каланă. Экзаменсене тытнă вăхăтра ытлашши хумханма юраманнине палăртнă. «Эсир ачасем пуçаруллă, сирĕн тĕллевсем те пысăк. Йывăрлăхсене çĕнтерессишĕн, хăвăрăн ума лартнă тĕллевсене пурнăçа кĕртме тăрăшатăр. Вĕрентсе кăларнă учительсене нихăçан та ан манăр. Вĕсем сире ăс панă, малалла та хăвăрăн тавра-курăма пуянлатассишĕн вăя хурса вĕренĕр», - тенĕ республика Пуçлăхĕ Михаил Игнатьев. Талантлӑ яшсемпе хӗрсене хавхалантарас тӗллевпе кашни ҫулах Ҫамрӑксен патшалӑх премийӗсене параççĕ, пултарулӑхӗпе уйрӑмах палӑрса тӑракан ҫамрӑксемпе студентсем вара Чӑваш Республикин Пуҫлӑхӗн ятарлӑ стипендийӗсене илсе тӑраҫҫӗ, ҫамрӑксен инновациллӗ тата вариативлӑ программисем валли грантсем уйӑраççĕ.«Пуласлӑх хастар чунлӑ ҫамрӑксенче, ӗҫрен пӑрӑнман, пурнӑҫра паха опыта ӑша хывса пыракан, аслисене сума сӑвакан, таврари ҫынсене хисеплекен, тӑван ҫӗре пӗтӗм чунтан юратакан яш-кӗрӗмре. Чӑваш Республикинче ҫамрӑксене хӑйсен пултарулӑхне туллин уҫса пама пулӑшакан патшалӑх политики ҫирӗп тӗллевлӗн пурнӑҫланса пырать. Пӗлӳ учрежденийӗсенчен вӗренсе тухакансене ӗҫе вырнаҫтарасси ҫине уйрӑмах тимлӗн пӑхатпӑр», - тенĕ Пуçлăх. «Хăвăрăн вăя яланах шанмалла. Тăрăшса вĕренмелле. Эпĕ яланах çамрăксене шанатăп! Лайăх çул пултăр, юлташсем!», - тесе ырă сунса пехилленĕ шкултан вĕренсе тухакансене Михаил Игнатьев. Çу уйăхĕн 22-23-мĕш кунĕсенче республикăри пур шкулта та савăнăçлă линейкăсем иртнĕ. Кăçал республикăра пурĕ 6 пин те 500 ача 11-мĕш классран вĕренсе тухнă. Тĕплĕнрех