Чăваш Республикин Пуçлăхĕ Михаил Игнатьев Раҫҫейри Предпринимательсен кунӗ ячĕпе саламлани
Чӑваш Енӗн хаклӑ предпринимателӗсем!
Сире професси уявӗпе саламлатӑп!
Предпринимательсем ҫӗршыв экономикине аталантарас енӗпе пысӑк ӗҫ тӑваҫҫӗ. Пултаруллӑ вӑй-халӑра ҫӗнӗ проектсем пурнӑҫлама ярса, предприятисем уҫса, ӗҫ вырӑнӗсем йӗркелесе эсир хӑвӑр пурнӑҫӑра лайӑхлатнипе пӗрлех ҫӗршывӑн финанс тытӑмӗн конкурентлӑхне ӳстерме, халӑха ӗҫпе тивӗҫтерес ыйтӑва татса пама пулӑшатӑр.
Республикӑра пӗчӗк тата вӑтам бизнес сферинче 153 пин ҫын ытла вӑй хурать, ку вӑл экономикӑра ӗҫлекенсен пӗрре виҫҫӗмӗш пайне яхӑн.
Ӗҫлӗ климата лайӑхлатасси, предпринимательсен пуҫарӑвӗсене пулӑшса пырасси Чӑваш Ен патшалӑх политикин тӗп тӗллевӗсенчен пӗри шутланать. Республикӑра бизнеса тухӑҫлӑ ӗҫлеме пулӑшакан хӑватлӑ инфратытӑм туса хунӑ, ун шутне бизнес-инкубаторсем, ҫамрӑксен инноваци пултарулӑхӗн центрӗ, прототипировани, инжиниринг, сертификаципе стандартизаци тата тӗрӗслев центрӗсем кӗреҫҫӗ.
Пӗлтӗр патшалӑх пулӑшӑвӗн тӗрлӗ майӗсемпе ҫичӗ пине яхӑн пӗчӗк тата вӑтам предприяти усӑ курнӑ, пилӗк пинӗшӗнчен ытларахӑшне информаци, консультаци тата право пулӑшӑвӗпе тивӗҫтернӗ.
Тӗллевлӗн тытса пыракан патшалӑх политикин ырӑ витӗмне пула пӗчӗк тата вӑтам предприятисем туса кӑларакан продукци тӳпи палӑрмаллах пысӑкланнӑ.
Власть органӗсемпе предпринимательсен пӗрлӗхӗн представителӗсен хушшинчи усӑллӑ диалог, вӗсен пӗрлехи ӗҫӗ республикӑри бизнеса аталантармалли шанчӑклӑ никӗс пулса тӑрасса, Чӑваш Ен экономика тытӑмӗн ҫирӗплӗхне малалла та ӳстерме пулӑшса пырасса шанса тӑратӑп.
Сире пӗтӗм чунтан ҫирӗп сывлӑх, мӗнпур ырӑ пуҫарура ҫитӗнӳсем, телей тата ырлӑх сунатӑп!
Чӑваш Республики Пуҫлӑхӗ М.Игнатьев