Чăваш Республикин Пуçлăхĕ Михаил Игнатьев Радио кунӗ ячӗпе саламлани
Ҫыхӑнупа электронлӑ массӑллӑ информаци отраслӗсен хисеплӗ ӗҫченӗсем тата ветеранӗсем!
Радио кунӗ ячӗпе чунтан саламланине йышӑнсамӑр!
Кӑҫал ҫак уяв хӑйӗн 70 ҫулхи юбилейне палӑртать. Ӑна Александр Попов радиоприемник шухӑшласа кӑларнӑранпа 50 ҫул ҫитнӗ ятпа тата ҫыхӑнупа радио ӗҫченӗсем Аслӑ Ҫӗнтерӗве ҫывхартма питех те пысӑк тӳпе хывнине шута илсе йӗркеленӗ.
Ҫыхӑну хатӗрӗсемпе электронлӑ массӑллӑ информаци хатӗрӗсем Чӑваш Енӗн политика, экономика тата культура пурнӑҫӗнче пысӑк пӗлтерӗшлӗ вырӑн йышӑнса тӑраҫҫӗ.
Паян республикӑра хальхи йышши информаци технологийӗсем хастарлӑн ӗҫе кӗреҫҫӗ, медиахутлӑх тухӑҫлӑн аталанать, ҫӗнӗ радиостанцисемпе телеканалсем уҫӑлаҫҫӗ. Ҫакӑ пурте ҫӳллӗ шайри ӑсталӑхлӑ пысӑк йышлӑ специалистсен пӗрлехи ӗҫӗн, пурнӑҫра вӗсем яланах ҫӗнӗ идейӑсемпе йышӑнусене мала хунин витӗмлӗ кӑтартӑвӗ.
Чи ҫывӑх ҫулсенче Чӑваш Енре «цифрӑллӑ танмарлӑха» пӗтерес тӗлӗшпе пурнӑҫлакан ӗҫ малалла тӑсӑлӗ. Халӑх пурӑнакан мӗнпур вырӑнтах унти ҫынсем валли информацин тӗрлӗ ҫӑлкуҫӗпе тата пахалӑхлӑ ҫыхӑну пулӑшӑвӗпе усӑ курмалли пӗр тан лайӑх майсем йӗркеленмелле.
Ҫыхӑну отраслӗн тата массӑллӑ информаци хатӗрӗсен ӗҫченӗсемпе ветеранӗсене ырми-канми тата хавхалануллӑ ӗҫӗшӗн, суйласа илнӗ профессие парӑннӑшӑн чунтан тав тӑватӑп. Ҫирӗп сывлӑх, иксӗлми вӑй-хал, пултарулӑхра ҫӗнӗ ҫитӗнӳсем, телей тата ырлӑх сунатӑп!
Чӑваш Республикин Пуҫлӑхӗ М. Игнатьев
