Чăваш Республикин Пуçлăхĕ Михаил Игнатьев Тӑван ҫӗршывӑн Аслӑ вӑрҫинче Ҫӗнтерӳ тунӑранпа 70 ҫул ҫитнӗ ятпа саламлани
Хаклӑ ентешӗмӗрсем!
Сире Тӑван ҫӗршывӑн Аслӑ вӑрҫинче Ҫӗнтерӳ тунӑранпа 70 ҫул ҫитнӗ ятпа пӗтӗм чунтан саламлатӑп!
Ҫак уяв пирӗн халӑхӑн виҫесӗр паттӑрлӑхӗпе хастарлӑхне, пысӑк хӑюлӑхӗпе ҫирӗп чун хавалне тата вӑл Тӑван ҫӗршыва хӗрӳллӗн юратнине витӗмлӗн сӑнарлакан ҫутӑран та ҫутӑ символ пулса тӑрать!
Чӑваш Енре ҫуралса ӳснӗ 200 пин ытла ҫын вӑрҫӑ фрончӗсенче тӑшмана хирӗҫ хастарлӑн ҫапӑҫса Аслӑ Ҫӗнтерӗве ҫывхартма паха тӳпе хывнӑ. Вӗсен шутӗнче 66 Совет Союзӗн Геройӗ тата Мухтав орденӗн 11 тулли кавалерӗ. 106 пине яхӑн ентеш каялла таврӑнман – ҫапӑҫу хирӗнче пуҫне хунӑ тата сурансене пула госпитальсенче вилнӗ.
Ҫӗршыва ҫапӑҫу хирӗнче хӳтӗленӗ тата вӑрҫӑ хыҫҫӑнхи ишӗлчӗкрен ура ҫине тӑма пулӑшнӑ ҫынсен шучӗ ҫулсерен чакса пырать. Паян Чӑваш Енре пӗр пин ҫурӑна яхӑн вӑрҫӑ участникӗ тата 22 пин ытла тыл ӗҫченӗ пурӑнать. Вӗсенчен кашнинех кирлӗ пек тимлӗхпе пӑхмалла тата власть органӗсемпе общество организацийӗсен, ҫывӑх ҫыннисемпе тӑванӗсен ырми-канми пулӑшӑвӗпе тивӗҫтермелле.
Пирӗн республикӑра Тӑван ҫӗршывӑн Аслӑ вӑрҫине халалланӑ асӑну вырӑнӗсемпе сооруженийӗсем 1100 ытла, ҫав шутра 500 ытла обелисксемпе мемориалсем, палӑксемпе стелӑсем, асӑну паллисем. Ҫӗршывӑмӑрӑн ирӗклӗхӗпе никама пӑхӑнманлӑхӗшӗн хӑйсен пурнӑҫне панӑ паттӑрсен палӑкӗсене юсаса ҫӗнетес ӗҫе Чӑваш Енре пурӑнакан мӗнпур ҫыннӑн хастар хутшӑнмалла.
Ветерансене ҫитӗнекен ӑрӑва патриотла воспитани парас, ҫамрӑксен чунӗнче хамӑрӑн ҫӗршывпа мӑнаҫланас туйӑма ҫирӗплетес тата унӑн шӑпишӗн яваплӑ пулнине ӑша хывма пулӑшас тӗлӗшпе тӑвакан пархатарлӑ ӗҫшӗн чӗререн тав тӑватӑп. Пирӗн ҫамрӑксем ҫӗнтерӳҫӗсен ӑрӑвне тивӗҫлӗ пулса ҫитӗнесси, вӗсемшӗн вӑрҫӑ геройӗсен паттӑрла ӗҫӗсем яланах хӑюлӑхпа тӳсӗмлӗх, Тӑван ҫӗршыва чунтан парӑнса тӑнин тӗслӗхӗ пуласси пирки пӗрре те иккӗленместӗп.
Пурне те ҫирӗп сывлӑх, мӗнпур ыррине, тӑнӑҫлӑхпа юрату, шанчӑк, телей тата ырлӑх сунатӑп!
Чӑваш Ен Пуҫлӑхӗ М.Игнатьев