Чăваш Республикин Пуçлăхĕн тивĕçĕсене вăхăтлăха пурнăçлакан Михаил Игнатьев «Пысăк сыпӑсене эндопротезировани тăвассипе çыхăннă ҫивӗч ыйтусем» регионсем хушшинчи наукăпа практика VII-мĕш конференцийӗн ĕçне хутшăннă
Çĕртме уйăхĕн 26-мĕшĕнче Чăваш Республикин Пуçлăхĕн тивĕçĕсене вăхăтлăха пурнăçлакан Михаил Игнатьев «Пысăк сыпӑсене эндопротезировани тăвассипе çыхăннă ҫивӗч ыйтусем» регионсем хушшинчи наукăпа практика VII-мĕш конференцийӗн ĕçне хутшăннă. Палăртнă мероприятие Раççейри 18 регионтан паллӑ специалистсем пухӑннӑ. Михаил Игнатьев çакăн пек мероприятисем хальхи вӑхӑтри технологисене ӗҫе кĕртме пулăшу кӳнине каланă. «Юлашки çулсенче республикăра пысăк шайри профессиллĕ пулăшупа тивĕçтерекен ку чухнехи сиплев тата диагностика центрĕсем хута кайнă. Травматологи, ортопеди тата эндопротезировани центрĕ отраслӗн тӗп пайӗ пулса тăчĕ. Кунта пысӑк опытлă специалистсем ӗҫлеҫҫӗ. Врачсем хăйсен пĕлĕвне Раççейре тата ют çĕршывсенче тăтăшах ӳстерсе пыраççĕ», - тенĕ Михаил Игнатьев. Раççейри Р.Р. Вреден ячĕллĕ травматологипе ортопеди наукăпа тĕпчев институчĕн директорне Рашид Тихилова тата Федерацин травматологипе ортопеди тата эндопротезировани центрĕн тĕп врачне Николай Николаева çынсен сывлăхӗшӗн пӗр-пӗринпе туслӑн хутшӑнса ӗҫленӗшӗн тав тунă. «Республикăри влаç органĕсенче тăрăшакансен çитĕнĕвĕсем цифрăсенче те лайăх курăнаççĕ. Чăваш Енре медицина пулăшӑвӗ кӳмелли хăватлă инфратытăм йĕркеленнĕ. Кунта пурӑнакан çынсен пурнăç тăршшĕ 2,5 хут пысӑкланнӑ. Нумай çул пурăнакансен йышĕ юлашки çулсенче 18 процент чухлӗ, нумай ачаллă çемьесен шучĕ 25 процент чухлӗ ӳснӗ», - тенĕ Михаил Игнатьев. Ҫавӑн пекех вӑл Шупашкарти Индустри паркĕнче строительство ĕçне тытӑнни ҫинчен пӗлтернӗ. Малашлăхра унти пӗр компани эндопртезированипе травмотологи центрӗсем валли имплантантсемпе ӗҫ хатӗрӗсем туса кӑларма палӑртать. «Инвестици проекчĕсене пурнăçа кĕртме вырӑн шыракансем пур пулсан, эпир вĕсене пулӑшма хатӗр», - палăртнă Михаил Игнатьев. Вӑл конференци ӗҫне хутшӑнакансене пурнăçра ăнăçусем, пĕр-пĕрин опычĕпе ӑнӑҫлӑн паллашма сĕннĕ. Тĕплĕнрех