Чăваш Республикин Пуçлăхĕ Михаил Игнатьев Социаллӑ сферӑн ӗҫченӗсен кунӗ ячĕпе саламлани
Социаллӑ сферӑн хисеплӗ ӗҫченӗсем тата ветеранӗсем!
Професси уявӗ ячӗпе пӗтӗм чунтан тата ӑшшӑн саламланине йышӑнсамӑр!
Сирӗн ӗҫӗр кирек хӑҫан та чи ҫынлӑхлисен тата яваплисен шутӗнче. Эсир патшалӑхран уйрӑмах тимлӗхпе пулӑшу кӗтекен ҫынсене пулӑшатӑр. Сирӗн евӗклӗхӗре тата ырӑ кӑмӑлӑра пула ветерансемпе нумай ачаллӑ ҫемьесем, хевтесӗрсемпе сахал тупӑшлӑ ҫынсем кирлӗ пулӑшӑва вӑхӑтра илсе тӑраҫҫӗ.
Чӑваш Енре 400 пин ытла ҫын социаллӑ пулӑшупа усӑ курать. Тӑван тӑрӑхра пурӑнакансем ыйтнипе республика Правительстви кӑҫалхи ҫӗртме уйӑхӗн 1-мӗшӗнчен тытӑнса «Ӗҫ ветеранӗ» ята тивӗҫмелли ӗҫ стажне икӗ ҫул ҫурӑна ҫити чакартрӗ. Ҫак йышӑну ҫӗршыв ырлӑхӗшӗн нумай ҫул хушши тӑрӑшса ӗҫленӗ тата 10 пин ҫынна ветерансене тивӗҫекен ҫӑмӑллӑхсемпе усӑ курма май туса парать. Нумай ачаллӑ ҫемьесене пулӑшасси ҫине уйрӑмах пысӑк тимлӗхпе пӑхатпӑр, вӗсен шучӗ юлашки 5 ҫулта 25 процента яхӑн ӳсрӗ.
Ресубликӑра ватӑ ҫынсемпе сусӑрсен пурнӑҫ пахалӑхне лайӑхлатма тата вӗсен социаллӑ ыйтӑвӗсене тивӗҫтермелли шая ӳстерме пулӑшакан ҫӗнӗ социаллӑ проектсем ӑнӑҫлӑн пурнӑҫланаҫҫӗ. Вӗсен шутӗнче – «юридически клиникӑсем», тухса ҫуреймен граждансем валли ӗҫлекен килти интернет-клуб, «Аслӑ ӑру университечӗ», реабилитаци валли кирлӗ техника хатӗрӗсен прокат пункчӗ, «Пӗрлехи диспетчер служби».
Ҫамрӑксене ырӑ кӑмӑллӑ тата хӗрхенӳллӗ пулма вӗрентсе ӳстерес ӗҫе пысӑк тӳпе хывакан ветерансене уйрӑммӑн палӑртса тав сӑмахӗ калатӑп.
Хисеплӗ социаллӑ ӗҫченсем, ырми-канми ӗҫӗршӗн тав тӑватӑп, сире тата сирӗн ҫывӑх ҫыннӑрсене чун-чӗререн ҫирӗп сывлӑх, мӗнпур ырӑ ӗҫре ҫитӗнӳсем, телей тата ырлӑх сунатӑп!
Чӑваш Республикин Пуҫлӑхӗ М. Игнатьев