Чăваш Республикин Пуçлăхĕн тивĕçĕсене вăхăтлăха пурнăçлакан Михаил Игнатьев Раҫҫей почтин кунӗ ячӗпе саламлани
Почта ҫыхӑнӑвӗн хисеплӗ ӗҫченӗсем тата ветеранӗсем!
Професси уявӗпе – Раҫҫей почтин кунӗ ячӗпе – манӑн пӗтӗм чунтан саламланине йышӑнсамӑр!
Раҫҫей почти вӑл – Раҫҫей Федерацийӗн стратегилле предприятийӗсен йышне кӗрекен, почта ӗҫӗсене федераци шайӗнче пурнӑҫлакан оператор. Эсир ҫӗршывӑмӑрӑн тата Чӑваш Республикин социаллӑ пурнӑҫпа экономикин аталанӑвне питех те пысӑк тӳпе хыватӑр. Почта сферинче тӑрӑшакан пин-пин ҫын ӗҫӗнчен пирӗн граждансен пурнӑҫ пахалӑхӗ те килет. Экономикӑри кӑткӑс лару-тӑрӑва пӑхмасӑр, Раҫҫей почтин Чӑваш Енри филиалӗ хӑйӗн уйрӑмӗсен тытӑмне сыхласа хӑварчӗ, ҫак кунсенче вара вӑл Алькеш поселокӗнче ҫӗнӗ почта офисне уҫать. Почта тытӑмне пула пирӗн республикӑн чи инҫетри кӗтесӗнче пурӑнакансем те ку чухнехи ҫыхӑну каналӗсемпе, почта пулӑшӑвӗпе тата финанс енӗпе паракан пулӑшу ӗҫӗсемпе пӗр чӑрмавсӑрах усӑ курма пултараҫҫӗ.
2014 ҫулта республикӑри почта ҫыхӑнӑвӗн уйрӑмӗсем урлӑ 12,5 миллион ҫыру, бандероль тата посылка иртнӗ, 7,2 миллион тенкӗлӗх тӗрлӗ тӳлев йышӑннӑ, 4 миллиона яхӑн пичет кӑларӑмне вӗсене ҫырӑнса илекенсене ҫитерсе панӑ. Почтальонсем тивӗҫлӗ канури 144 пин ҫынна кашни уйӑхрах пенси укҫипе тивӗҫтерсе тӑраҫҫӗ. Ҫак цифрӑсем Чӑваш Республикинче пурӑнакансем Раҫҫей почтин ӗҫне, унӑн шанчӑклӑхне тата пысӑк пахалӑхне пула, чӑннипех кӑмӑлласа йышӑннине ҫирӗплетеҫҫӗ.
Эпӗ мӗнпур почтальонпа оператора, сортировщикпа водителе, почта ҫыхӑнӑвӗн тӗрлӗ шайри специалисчӗсене кӑткӑс та питӗ яваплӑ ӗҫӗшӗн чун-чӗререн тав тӑватӑп. Сире тата сирӗн ҫемйӗрсене пӗтӗм чунтан ҫирӗп сывлӑх, ырлӑх, почта ӗҫӗнче ҫӗнӗ ӑнӑҫусемпе ҫитӗнӳсем тума иксӗлми вӑй-хал сунатӑп.
Чӑваш Ен Пуҫлӑхӗн тивӗҫӗcене
вӑхӑтлӑха пурнӑҫлакан М. Игнатьев