Чăваш Республикин Пуçлăхĕн тивĕçĕсене вăхăтлăх пурнăçлакан Михаил Игнатьев Вӑрман отраслӗн ӗҫченӗсен кунӗ ячӗпе саламлани
Вӑрман отраслӗн хисеплӗ ӗҫченӗсем тата ветаранӗсем!
Сире професси уявӗ ячӗпе саламлатӑп!
Пирӗн республика мӗн авалтан вӑрмансен илемӗпе тата пуянлӑхӗпе палӑрса тӑрать. Вӗсене сыхласа хӑварассишӗн тата ҫӗнетсе пырассишӗн тӑрӑшасси — Чӑваш Ен патшалӑх политикин тӗп ҫул-йӗрӗсенчен пӗри.
Регионта вӑрманпушар служби тухӑҫлӑ ӗҫлет, вӑрман хуҫалӑхӗн сферинче 800 яхӑн ҫын вӑй хурать. Вӗсем вӑрманти пушар хӑрушсӑрлӑхне тивӗҫтереҫҫӗ, вӑрмана сӑтӑр тӑвакан хурт-кӑпшанкӑсене вӑхӑтра тупса палӑртса сиенсӗрлетеҫҫӗ, йывӑҫ тӗсӗсене лайӑхлатса пыраҫҫӗ, вӑрман тухӑҫлӑхне тата ҫирӗплӗхне ӳстерес, унти пурнӑҫ тӗрлӗлӗхне сыхласа хӑварас тесе ырми-канми тӑрӑшаҫҫӗ, йывӑҫ ларса ӳстереҫҫӗ.
2010 ҫулта Чӑваш Ен, Раҫҫейри ытти субъектсем пекех, вӑрман пушарӗсене пула шар курчӗ. Хальхи вӑхӑтра вӑрманҫӑсем ҫав сиене пӗтерес тата вӑрманта пушар тухасран сыхланас енӗпе хастарлӑн ӗҫлеҫҫӗ. Ҫунӑк вӑрмансен лаптӑкӗн 95 процентне тасатса йӗркене кӗртнӗ, ҫуннӑ вӑрмансен 40 яхӑн процентпа танлашакан лаптӑкне чӗртсе тӑратнӑ, ку енӗпе тӑвакан ӗҫсем малалла пыраҫҫӗ.
Юлашки 5 ҫулта вӑрманпушар техникин йышӗ вун-вун ятарлӑ автомобильпе, ятарлӑ техникӑпа тата хатӗр-хӗтӗрпе пуянланчӗ. Асӑрхаттару ӗҫӗсене комплекслӑ майпа пурнӑҫланине пула кӑҫал Чӑваш Енпе Тутарстан территориӗсенчи вӑрмансенче, Атӑлҫи федераци округӗнчи ытти регионсемпе танлаштарсан, пушарсем пулман.
2013 ҫултан пуҫласа вӑрман хуҫалӑхне пахалӑхлӑн тытса пыма республика бюджетӗнчен самаях пысӑк укҫа-тенкӗ уйӑрма тытӑннӑ.
Хӑйӗн ырми-канми ӗҫӗпе тӑван ен ҫут ҫанталӑк пуянлӑхне перекетлеме тата ӳстерсе пыма пулӑшакан мӗнпур ҫынна чунтан тав тӑватӑп. Ҫирӗп сывлӑх, палӑртнӑ мӗнпур тӗллеве пурнӑҫлама, телей тата ырлӑх сунатӑп!
Чӑваш Республикин Пуҫлӑхӗн
тивĕçĕсене вăхăтлăх пурнăçлакан М.Игнатьев