Чăваш Республикин Пуçлăхĕ Михаил Игнатьев Машинӑсем тӑвакан отраслӗн ӗҫченӗсен кунӗ ячӗпе саламлани
Республикӑри машинӑсем тӑвакан отраслӗн хисеплӗ ӗҫченӗсем тата ветеранӗсем!
Сирӗн професси уявӗпе чун-чӗререн саламланине йышӑнсамӑр!
Чӑваш Еншӗн машинӑсем тӑвакан комплекса аталантарасси яланах тӗп вырӑнта пулнӑ. Промышленность тракторӗсен завочӗ, Шупашкарти агрегат завочӗ, Г.А. Ильенко ячӗллӗ «Элара» наукӑпа производство комплексӗ, Шупашкарти электроаппарат завочӗ, Шупашкарти В.И. Чапаев ячӗллӗ производство пӗрлешӗвӗ евӗр пысӑк предприятисем республикӑри промышленность тата ӑслӑлӑх пурнӑҫӗн центрӗсем шутланаҫҫӗ.
Машиностроени паян унчченхи евӗрех Чӑваш Ен экономикин ӳсӗмӗн локомотивӗ шутӗнче, ҫавӑн пекех вӑл интенсивлӑ аталанакан тата инновациллӗ технологисене ӗҫе кӗртекен хутлӑх та.
Чӑваш Ен Правительстви отрасле ҫирӗппӗн аталантарма, пысӑк технологиллӗ, конкурентлӑ ҫӗнӗ машиностроение техника тӗлӗшӗнчен пуянлатассине тата ҫӗнетессине тӗпе хурса йӗркелеме лайӑх майсем тӑвать. Республикӑра производствӑна диверсификацилемелли политика ӑнӑҫлӑн пурнӑҫланать, ӑслӑлӑхпа тачӑ ҫыхӑннӑ предприятисем, пысӑк тухӑҫлӑ ӗҫ вырӑнӗсем йӗркеленеҫҫӗ, импорта улӑштармалли таварсем туса хатӗрлесе кӑларасси хастарлӑн йӑлана кӗрсе пырать.
Машинӑсем тӑвакан промышленноҫра 2015 ҫулта электронлӑ компонентсем, радиопа телевидени тата ҫыхӑну валли аппаратура туса кӑларасси самаях ӳсни палӑрать.
Отраслӗн хисеплӗ ветеранӗсем, ҫӑмӑл мар ырми-канми ӗҫӗршӗн тата хӑвӑрӑн паха опытӑрпа пӗлӗвӗре ҫамрӑк ӑрӑва панӑшӑн пӗтӗм чунтан тав тунине йышӑнсамӑр.
Машинӑсем тӑвакан отраслӗн ӗҫченӗсем яланах хӑйсен умне лартнӑ тӗллевсене пурнӑҫлас шутпа пӗтӗм вӑя пуҫтарма пӗлнипе палӑрса тӑнӑ. Шанатӑп: пӗрлехи вӑйпа эпир Чӑваш Енри машинӑсем тӑвакан комплексӑн унчченхи чапне чӗртсе тӑратма кӑна мар, ӑна ҫаплах аталанӑвӑн ҫӗнӗ шайне те кӑларма пултарӑпӑр.
Мӗнпур машиностроителе ҫирӗп сывлӑх, телейпе ӑнӑҫулӑх, Чӑваш Республикин ырлӑхӗшӗн тӑвакан ӗҫре ҫитӗнӳсем сунатӑп!
Чӑваш Республикин
Пуҫлӑхӗ М.Игнатьев