Чăваш Республикин Пуçлăхĕ Михаил Игнатьев Шалти ӗҫсен органӗсен ӗҫченӗсен кунӗ ячӗпе саламлани
Шалти ӗҫсен органӗсен хисеплӗ ӗҫченӗсем тата ветеранӗсем!
Сире професси уявӗ ячӗпе саламлатӑп!
Ҫак савӑнӑҫлӑ кун эпир хастар та хӑюллӑ, служба тивӗҫне чунтан парӑннӑ, пысӑк яваплӑхлӑ тата хӑйсен ӗҫне лайӑх пӗлекен полици ӗҫченӗсене чыслатпӑр, вӗсем патшалӑх интересӗсемпе республикӑра пурӑнакан ҫынсен прависене хӳтӗлес сферӑра хӑйсен професси тивӗҫӗсене чыслӑн та йӗркеллӗн пурнӑҫласа пыраҫҫӗ.
Палӑртма кӑмӑллӑ: Чӑваш Енре патшалӑх влаҫӗн органӗсемпе право сыхлавӗн тытӑмӗсем пӗр-пӗринпе тухӑҫлӑн хутшӑнса ӗҫлеҫҫӗ.
Социаллӑ пурнӑҫпа экономикӑн ҫивӗч ыйтӑвӗсене татса парас, обществӑри йӗркелӗхе тивӗҫтерес тӗллевпе тӑвакан пӗрлехи ӗҫ регионти общество-политика тӑнӑҫлӑхне тата нацисем хушшинчи килӗшӳлӗхе шанчӑклӑн упрама, криминаллӑ лару-тӑрӑва асӑрхаса тӑма, преступлени тӑвассипе шеллевсӗр кӗрешме май парать.
Тӑван Чӑваш Енре лӑпкӑлӑхпа тӑнӑҫлӑха сыхласа упрас, саккунлӑхпа право йӗркине ҫирӗппӗн тытса пырас тӗлӗшпе тӑвакан ӗҫӗршӗн сире ҫак уяв кунӗнче чун-чӗререн тав тӑватӑп.
Паян эпир шалти ӗҫсен органӗсене халӑх шанасси ӳссе пырать тесе ҫирӗплетсех калама пултаратпӑр. Ҫакӑ сирӗн пархатарлӑ ӗҫӗн пысӑк хаклавӗ!
Шалти ӗҫсен органӗсен ӗҫченӗсемпе ветеранӗсене пӗтӗм чунтан ҫирӗп сывлӑх, ҫемье ырлӑхне, тӑнӑҫлӑх тата мӗнпур лайӑххине сунатӑп!
Чӑваш Республикин Пуҫлӑхӗ М.Игнатьев
