Михаил Игнатьев Министрсен Кабинечĕн членĕсемпе, федераци влаçĕн территори органĕсен тата хула округĕсен ертӳçисемпе канашлу ирттернĕ

 Паян республика Пуçлăхĕ Михаил Игнатьев Правительство членĕсемпе тата федерацин регионти тĕрлĕ службисен ертӳçисемпе кашни эрнере пулакан ĕçлĕ планеркăна ирттернĕ. Чи малтанах канашлу ĕçне пуçличчен,  Халăх пĕрлĕхĕн кунĕ регионта нимĕнле кăлтăксемсĕрех иртсе кайнине пĕлтернĕ. Федераци шайĕнчи çул-йĕрсем çинче инкексем пулни пирки чарăнса тăнă. Пур службăра ĕçлекенсем те яваплăха туйса, инкеке вăхăтра сирсе яма пулăшнине асăннă.   Раççей регионĕсенче юлашки вăхăтра газпа çыхăннă хăрушă тĕслĕхсем çинчен каланă. Нумай хваттерлĕ çуртсем сирпĕне, сирпĕне кайнине пăшăрханса палăртнă. Сăмаха май, пирĕн республикăра та 2013 çулта Çĕрпӳ районĕнче Туçара çутçанталăк газне пула, нумай хваттерлĕ çурт йăлтах арканнине асăнса хăварнă.  Йывăр çемьесене уйрăмах пысăк тимлĕх уйăрмаллине асăрхаттарнă.

 Хĕллехи тапхăра хатĕрленсе ирттернĕ ĕçсемпе Чăваш Республикин транспорт тата çул-йĕр хуçалăхĕн министрĕ Михаил Резников тĕплĕн паллаштарнă. «Чувашупрдор» КУ подрядлă организацисен ĕçĕсене тивĕçлĕ шайра тĕрĕслесе тухнине, регионти, муниципалитетсенчи çул-йĕрсене типтерлĕ пăхса тăнине пĕлтернĕ. «Хĕллене çул-йĕр служби пĕтĕмпех хатĕр.  Техника таврашĕ çителĕклĕ, çулсем валли ятарлă хатĕрсемпе те туллин тивĕçтернĕ», - палăртнă Михаил Резников. Регион пĕлтерĕшлĕ çулсене тирпейлесе тăма 34,5 пин тонна хăйăр хатĕрленĕ, тăвар йышши хатĕре 37,6 пин тонна, реагент - 3,5 пин тона пуррине асăннă. Пĕтĕмпе 248 техника куллен çулсем тасатма яланах хатĕр тăнине палăртнă. Муниципалитетсенче пурĕ 548 техника, федераци пĕлтерĕшлĕ çулсене тасатма 100 автомашина хатĕр тăнине каланă. Пĕр сăмахпа палăртсан, лару-тăру лайăх пулнине пĕлтернĕ. Муниципалитет пĕрлешĕвĕсенче 2017 çулта çулсене тирпейлеме ирĕк паракан контрактсене те алă пусса çирĕплетнине асăннă. Уйрăмах ку енĕпе Улатăр, Элĕк, Канаш, Каçал ен, Муркаш, Çĕрпӳ районĕсенче  лару-тăру йĕркеллĕ пулнине те асăннă. Çул-йĕр хуçалăхне укçа-тенкĕне вăхăтра куçарса панине каланă республика Пуçлăхĕ. «Çанталăк лăпкă мар, мĕнпур службăсен яланах хатĕр пулмалла», - тенĕ вăл сăмаха тăснă май. Чӳк уйăхĕн 4-мĕшĕнче пулнă çул-йĕр çинчи инкеке тĕплĕн сӳтсе явнă. Автобус водителĕсем çул-йĕр прависене пăсни куçкĕретех. Асăннă вырăнсем тирпейлĕ пулнă, нимĕнле чăрмав та кӳменни каламасăрах паллă. Чăваш Республикин Министрсен Кабинечĕн Председателĕ Иван Моторин Çĕрпӳ тăрăхĕнче пулнă инкекшĕн пăшăрханса каланă, водителĕн çынсене микроавтобуспа илсе çӳретме ятарлă ĕç хучĕсем, çав шутрах лицензи те пулманнине пĕлтернĕ.  Шăпах та çакăн пек тӳрĕ кăмăлпа ĕçлеменнисем ыттисене чăрмав кĕнине çирĕппĕн палăртнă. Малашне ĕç-пуçа кулленех тĕрĕслесе пымаллине асăрхаттарнă. 

Чăваш Республикин сывлăх сыхлавĕн министрĕ Алла Самойлова инкекре айăпланнисене вăхăтра медицина пулăшăвĕпе тивĕçтернине пĕлтернĕ, çынсен сывлăхĕ паянхи куна аван тесе  каланă. Халăха хăрушсăрлăхпа тивĕçтересси патшалăх политикин приоритечĕ, кун пирки пирĕн пурин те лайăх ăнланмалла.  Çул-йĕр службин кунне çĕрне пĕлмесĕр тăрăшса, яваплăха туйса, хăйсен ĕçĕсене тивĕçлĕн пурнăçламаллине каласа хăварнă ертӳçĕсем.

 Шупашкар тата Çĕнĕ Шупашкар хулисенчи çулсене хĕллене еплерех хатĕрлесе çитерни пирки администрацисен ертӳçисем тĕплĕн каласа кăтартнă. «Хулара пурăнакансен, хăйсен автомашинисене кирлĕ кирлĕ мар çĕре лартса хăварма юрамасть, юр тасатакан техникăна чăрмав кӳрет.  Йĕрке пăсакансене çирĕп явап тыттармалла», - тесе асăрхаттарнă Чăваш Ен Пуçлăхĕ Михаил Игнатьев. Чăваш Республикин Министрсен Кабинечĕн Председателĕн çумĕ – экономика министрĕ Владимир Аврелькин хăйĕн сăмахĕнче, Чăваш Енрен сумлă делегаци Коми Республикинче ĕçлĕ визитпа кайса килни çинчен тĕплĕн каласа кăтартнă.   Халăх пĕрлĕхĕн кунне халалласа ирттернĕ мероприятисем çинчен Чăваш Республикин культура министрĕ Константин Яковлев  чарăнса тăнă. Министр регионти хуласемпе районсенче пурĕ 650 мероприяти иртнине асăннă. 

 Чăваш Республикин Министрсен Кабинечĕн Председателĕн Çумĕ – Чăваш Республикин Пуçлăхĕн Администрацийĕн Ертӳçи Юрий Васильев, Халăх пĕрлĕхĕн кунĕнчи митинг-концерт Шупашкарти Хĕрлĕ лапамра иртнине, унта 11 пине яхăн ытла çын хутшăннине пĕлтернĕ. Палăртма кăмăллă, уяв нимĕнле кăлтăксемсĕрех иртнĕ, пурне те савăк кăмăл парнеленĕ.   

 Чăваш Республикин Пуçлăхĕ Михаил Игнатьев канашлура пухăннисемпе йывăрлăх кăларса тăратакан ыйтусем пирки чарăнса тăнă. Канашра усал çӳп-çапа вăхăтра тирпейлесе пуçтарасси пирки халăх пĕр хуччен çеç мар ыйтса çырнă Чăваш Республикин Пуçлăхĕ Михаил Игнатьев патне. Чăваш Республикин Министрсен Кабинечĕн Председателĕн çумĕ – Чăваш Республикин Пуçлăхĕн Администрацийĕн Ертӳçи Юрий Васильев  хăйĕн сăмахĕнче, йывăрлăхсем ытларах Канаш хула администрацийĕнче ĕçлекенсем хăйсене шанса панă ĕçе тӳрĕ кăмăлпа пурнăçламаннишĕн сиксе тухнине каланă. Администрацийĕн пуçлăхĕ «тилхепене» çирĕп тытманни те куçкĕретех, шанса панă ĕçе яваплăха туйса пурнăçламалла.  Тата çакна та палăртнă: «Пулăшусемшĕн халăх вăхăтра укçа-тенкĕ тӳлесе пырать.  Вырăнти администраци тата «Чистый город» МУП  ыйтăва татса параймасть. Усал çӳп-çапа тиесе территорине тирпейлесе тăмасть», - тенĕ.  Чăваш Республикин Пуçлăхĕ сăмаха май, регионти патшалăхăн пурăнмалли çурт-йĕр инспекцине те çирĕп асăрхаттарнă.  «Эсир тĕплĕн ĕçлеменни курăнать. Сирĕн çитменлĕхсем те. Специалистсем тухса тĕрĕслеççĕ, анчах та усси çук», - тесе çирĕп асăрхаттарнă вăл Чăваш Республикинчи патшалăх çурт-йĕр инспекцийĕн ертӳçин тивĕçĕсене пурнăçлакан Александр Юркина. Паянхи çивĕч ыйтусене сӳтсе явнă май, çитес кунсенче ĕçлĕ визитпа Канаш хулине çитсе килессине пĕлтернĕ. Муниципалитетра йĕрке тăвассипе ĕçсене еплерех пурнăçласа пынине хăй тĕрĕслеме шантарнă.   Влаç органĕсенче ĕçлекен ертӳçĕсем хăйсен тытăмĕнче ĕçлекенсемшĕн яваплă,  шанса панă ĕçсене пурин те тӳрĕ кăмăлпа пурнăçламалла, ĕçре коррупци пачах пулмалла мар тенĕ вăл. Киревсĕр тĕслĕх пирки те чарăна тăнă, Чăваш Республикин спорт министрĕн пĕрремĕш çумĕ Алексей Яковлев патне уголовнăй майпа ĕç пуç уçнă. Михаил Игнатьев хăй енчен Алексей Яковлев пирки, вăл хăйне шанса панă ĕçе тӳрĕ кăмăлпа пурнăçламаннишĕн пĕр хуччен çеç мар асăрхаттарнă пулнă.  Çак должноçри тивĕçе туллин пурнăçламаннине те каланă. «Эпир кулленех коррупципе кĕрешетпĕр, малашне те кĕрешĕпĕр», - тесе пĕтĕмлетнĕ хăйĕн сăмахне регион Пуçлăхĕ. Шупашкар хулинчи муниципалитетăн пурлăхĕпе усă курнăшăн парăмсем чылай пухăнса кайнă. Паянхи куна вăл 350-400 млн танлашать.  Асăннă ыйтупа çивĕчрех ĕçлеме Шупашар хула пуçлăхĕн тивĕçĕсене пурнăçлакан Ирина Клементьевăна хушнă. «Темиçе çĕршер миллион парăм пухăннă арендаторсен. Паянхи куна та каялла парса татассишĕн тăрăшмаççĕ», - тенĕ вăл.  Кăлăхах, енчен те вĕсем вăхăтра укçа-тенкĕ куçарса пынă пулсан, çакă пĕтĕмпех социаллă пĕлтерĕшлĕ ыйтусене татса пама куçнă пулĕччĕ.  Çул-йĕрсене тытса тăма,  территорисене тирпей-илем кӳртме тенĕ регион Ертӳçи.  «Хула умĕнче эпир хамăр çине илнĕ пур ĕçе те туллин пурнăçлатпăр. Сирĕн вара, хăвăрăн ĕçсене яваплăха туйса, тӳрĕ кăмăлпа пурнăçламалла», - тесе асăрхаттарнă Михаил Игнатьев Шупашкар хула ертӳлĕхне. Ку хутĕнче Тракторсем тăвакан заводăн культура керменĕ пирки те чарăнса тăнă.  Ку ыйтăва маларах керменĕн директорне Наталья Фошинăна ĕçрен хăтарнă хыççăн хускатнă пулнă. Кермен паянхи кун та ăнăçлă ĕçлет, ачасем хушма пĕлӳ илме çӳреççĕ, пĕр сăмахпа каласан, культура керменĕ пăрахăçланман тенĕ Чăваш Республикин культура министрĕ Константин Яковлев. Кун йĕркинче ытти ыйтусене те пăхса тухнă, кашнинпех тивĕçлĕ йышăнусем туса хăварнă.

  



07 ноября 2016
14:29
Поделиться
Текстри йӑнӑша асӑрхарӑр-и?
Уйӑрса илӗр те пусӑр Ctrl+Enter