Чăваш Республикин Пуçлăхĕ Михаил Игнатьев Наука сферин ӗҫченӗсен кунĕ ячӗпе саламлани
Наука сферин хисеплӗ ӗҫченӗсем!
Сире Раҫҫей наукин кунӗ ячӗпе чун-чӗререн саламлатӑп!
Наука – техника прогресне, экономика ӳсӗмне тата халӑхӑн ырлӑх-пурлӑхне аталантарса пыракан хӑватлӑ вӑй. Социаллӑ пурнӑҫпа экономикӑри улшӑнусен ӑнӑҫулӑхӗ ӑсчахсемпе тӗпчевҫӗсен пултарулӑхӗпе опытӗнчен тата ҫирӗп тӗллевлӗхӗнчен нумай килет.
Хальхи условисенче наукӑпа тачӑ ҫыхӑннӑ, малта пыракан наукӑпа техника ҫитӗнӗвӗсене тата чи ӑнӑҫлӑ технологисене ӗҫе кӗртекен экономика кӑна конкурентлӑ пулма пултарать. Пирӗн тӗпчевҫӗсем туса хатӗрлекен ӗҫсенчен чылайӑшӗпе пурнӑҫра анлӑн усӑ курни савӑнтарать. Инновацисене аталантарас енӗпе республика паян малти ретри регионсен йышне кӗрет. Республикӑри кашни пиллӗкмӗш предприяти ҫӗнӗ йышши тавар туса кӑларать.
Пирӗн ӑсчахсен пуҫарӑвӗсемпе проекчӗсем наука пӗрлӗхӗ хушшинче лайӑх хак илеҫҫӗ тата вӗсене патшалӑх та пулӑшу кӳрет. Кашни ҫулах пирӗн тӗпчевҫӗсем наука тата техника енӗпе палӑртнӑ патшалӑх премийӗсене тивӗҫеҫҫӗ, регионти тата пӗтӗм Раҫҫейри конкурссен ҫӗнтерӳҫисем пулса тӑраҫҫӗ.
Паян ӑсчахсен умӗнче Чӑваш Енпе Раҫҫейӗн инноваципе технологи вӑй-хӑватне ӳстермелли тарӑн шайри тата практикӑра усӑ куракан тӗпчевсене аталантарас тӗллевсем тӑраҫҫӗ. Импорта улӑштарассине шута илсе халӑх ыйтнине тивӗҫтерме хамӑр ҫӗршыври тавар производствин ҫӗнӗ технологийӗсене туса хатӗрлеме кирли палӑрать.
Сирӗн талантӑрпа пултаруллӑ ӗҫӗр ӳлӗм те малалла аталанма пулӑшакан паха пуянлӑх пуласса шанса тӑратӑп.
Сире ҫӗнӗ открытисем, пысӑк ҫитӗнӳсем тата ӑнӑҫусем сунатӑп!
Чӑваш Республикин Пуҫлӑхӗ М.Игнатьев