Чăваш Республикин Пуçлăхĕ Михаил Игнатьев уголовлӑ айӑплава пурнӑҫлакан тытӑмӑн ӗҫченӗсен кунӗ ячӗпе саламлани
Чӑваш Енри уголовлӑ айӑплава пурнӑҫлакан тытӑмӑн хисеплӗ ӗҫченӗсем тата ветеранӗсем!
Сире професси уявӗпе саламлатӑп!
Хӑвӑрӑн ансат мар ӗҫӗрпе эсир обществӑри саккунлӑхпа йӗркелӗхе, граждансен хӑрушсӑрлӑхне тата ырлӑхне тивӗҫтеретӗр. Раҫҫейӗн айӑплава пурнӑҫлакан федераци службин Чӑваш Республикинчи управленийӗн учрежденийӗсенче чӑн-чӑн профессионалсем ӗҫлеҫҫӗ. Йӑнӑш утӑм тунӑ граждансене саккуна пӑхӑнса пурӑнмалли пурнӑҫа тавӑрасси ытларах чухне сирӗн тӑрӑшулӑхӑртан, чӗрӗр ӑшшинчен, пысӑк хӑюлӑхӑртан тата ҫирӗп кӑмӑлӑртан килет.
Юлашки ҫулсенче эсир ӗҫ тӑвакан власть органӗсемпе, вырӑнти хӑй тытӑмлӑх органӗсемпе, предприятисемпе, общество организацийӗсемпе тата тӗн конфессийӗсемпе тачӑрах та тухӑҫлӑрах хутшӑнса ӗҫлетӗр. Республикӑри мӗнпур юсану учрежденийӗнчех ӗҫе вырнаҫас ыйтусемпе справкӑпа-консультаци пункчӗсем йӗркеленӗ.
Чӑваш Енре судпа айӑпланнӑ ҫынсене кӳрекен медицина пулӑшӑвӗн пахалӑхне лайӑхлатасси, вӗсене пӗлӳ илме пулӑшасси, ҫавӑн пекех хупса усракан вырӑнсенчен ирӗке тухнӑ граждансене реабилитацилесси тата пурнӑҫра хӑйсен вырӑнне тупма пулӑшасси ҫине пысӑк тимлӗхпе пӑхаҫҫӗ.
Сире тӳрӗ кӑмӑлпа пурнӑҫлакан ӗҫӗршӗн тав тӑватӑп. Паттӑр тата чӑтӑмлӑ пулнӑшӑн тайма пуҫ! Ҫирӗп сывлӑх, хастар кӑмӑл, ҫирӗплӗхпе принциплӑх, шанӑҫлӑх тата ырлӑх сунатӑп.
Чӑваш Республикин Пуҫлӑхӗ М. Игнатьев