Чăваш Республикин Пуçлăхĕ Михаил Игнатьев Патшалӑх символӗсен кунӗ ячӗпе саламлани
Хисеплӗ ентешӗмӗрсем!
Сире Чӑваш Республикин Патшалӑх символӗсен кунӗ ячӗпе саламлатӑп.
Патшалӑх символӗсем нацин чи хаклӑ япалисем шутланаҫҫӗ, вӗсем чӑваш халӑхӗн пуян историне, унӑн ӗҫри, ӑслӑлӑхри, культура пурнӑҫӗнчи тата спортри ҫитӗнӗвӗсене сӑнарлаҫҫӗ.
Чӑваш Республикин гимнӗн савӑнӑҫлӑ та ҫӗкленӳллӗ сасси пирӗн чӗресене мӑнаҫлӑхпа тултарать, чунсенче гражданла хӑй ӑнланулӑхпа наци туйӑмне вӑратать, пире Чӑваш Ен ырлӑхӗшӗн ҫӗнӗ ҫитӗнӳсем тума хавхалантарать. Наци ялавӗ республика пурнӑҫӗнчи кашни пӗлтерӗшлӗ те чаплӑ пулӑма палӑртнӑ чухнех Раҫҫей триколорӗпе юнашар танлӑн та сумлӑн вӗлкӗшет.
Республика символӗсене мӗнлерех сума суни вӑл – республикӑна хӑйне те тивӗҫлӗн хисепленине палӑртни.
Патриотла кӑмӑл-туйӑм йӗркелес ӗҫре наци символики пысӑк вырӑн йышӑнса тӑрать. Паян пирӗн тӗп тӗллев – ҫитӗнекен ӑрӑва патшалӑх символикине типтерлӗн упрама, тӑван ҫӗре тата ҫӗршыва хисеплеме вӗрентсе пӑхса ҫитӗнтересси.
Юратнӑ Чӑваш Ен ялавӗпе гербӗ ҫийӗнче яланах мирлӗ тӳпе хуҫалантӑр. Хамӑр пурӑнакан тата унӑн ырлӑхӗшӗн тӑрӑшакан республикӑпа мӑнаҫланас туйӑм пирӗн чӗресене яланах ӑшӑтса тӑтӑр.
Сире ҫитӗнӳсем, тӑнӑҫлӑх тата ырлӑх сунатӑп.
Чӑваш Республикин Пуҫлӑхӗ М.Игнатьев
