Чăваш Республикин Пуçлăхĕ Михаил Игнатьев Ҫуркуннепе Ӗҫ уявӗ ячӗпе саламлани
Хисеплӗ ентешӗмӗрсем!
Сире пӗтӗм чунтан Ҫуркуннепе Ӗҫ уявӗ ячӗпе саламлатӑп!
Ӗҫри ӑнӑҫусем, сиртен кашнин професси тата пултарулӑх шайӗнчи вӑй-халӗ хальхи Чӑваш Енӗн мӗнпур витӗмлӗ ҫитӗнӗвӗн тата социаллӑ ҫирӗплӗхӗн никӗсне хываҫҫӗ, республикӑн тӗп пуянлӑхӗ шутланаҫҫӗ. Чӑваш ӗҫ ҫыннийӗ хӑйӗн ӗҫченлӗхӗпе, тӑрӑшулӑхӗпе, яваплӑ та тӳрӗ кӑмӑллӑ пулнипе таврара ырӑ ят ҫӗнсе илнӗ.
Пирӗн халӑх хушшинче ӗҫ ҫынни яланах хисепре пулнӑ. Шел те, ХХ ӗмӗр вӗҫнелле общество пурнӑҫӗнче унчченхи йӑла-йӗрке хаклӑхӗсен витӗмӗ палӑрмаллах чакса кайрӗ. Ҫавна пула экономикӑра та, социаллӑ пурнӑҫ сферинче те ҫивӗч ыйтусем тухса тӑчӗҫ. Пирӗн паянхи тӗллев – ӗҫ профессийӗсен чыс-сумне ӳстересси, ӗҫ ҫыннин ырӑ сӑнарне йӗркелесси. Кашнийӗнех ҫакна пӗлсе тӑмалла: унӑн таланчӗ, професси тата пултарулӑх шайӗнчи вӑй-халӗ халӑхӑмӑра, Тӑван ҫӗршыва тем пекех кирлӗ. Шӑпах ҫавӑнпа ӗнтӗ 2016 ҫула Чӑваш Республикинче Ӗҫ ҫыннин ҫулталӑкӗ тесе пӗлтертӗмӗр, регионта кашниех хӑйне килӗшекен професси суйласа илсе пултарулӑхне туллин уҫма пултармалли, производство культурине ӳстерсе пымалли майсем ҫирӗппӗн йӗркеленеҫҫӗ.
Хаклӑ ентешсем!
Кӑҫал Майӑн пӗрремӗшӗ Мӑнкунпа – православи тӗнӗн чи ҫутӑ та аслӑ уявӗпе, ҫынсен чӗрисене савӑнӑҫпа тата ҫутӑ шанӑҫпа вӑйлатакан праҫникпе, тӳр килчӗ. Уяв хаваслӑхӗ сире лайӑх кӑмӑл-туйӑм парнелетӗр, Тӑван ҫӗршыв ырлӑхӗшӗн пархатарлӑ та курӑмлӑ ӗҫсем тума хавхалантартӑр. Пӗтӗм чунтан тӑнӑҫлӑхпа ҫураҫулӑх, ҫирӗп сывлӑх, телей, ҫуралнӑ ҫӗр тата ҫӗршывӑмӑр ячӗпе ӗҫре ҫӗнӗ ҫитӗнӳсем тума сунатӑп.
Чӑваш Ен Пуҫлӑхӗ М. Игнатьев