Чăваш Республикин Пуçлăхĕ Михаил Игнатьев Радио кунӗ ячӗпе саламлани
Ҫыхӑну хатӗрӗсен, радиопа телевиденин хисеплӗ ӗҫченӗсем!
Сире професси уявӗпе – Радио кунӗ ячӗпе саламлатӑп!
Электронлӑ ҫыхӑну хатӗрӗсем общество пурнӑҫӗнче пысӑк вырӑн йышӑнса тӑраҫҫӗ. Радиотелекоммуникаци отраслӗн ӗҫченӗсен професси ӑсталӑхне пула Чӑваш Енре пурӑнакансем ку чухнехи лайӑх пахалӑхлӑ ҫыхӑну пулӑшӑвӗпе куллен усӑ кураҫҫӗ, республикӑра, ҫывӑхри тата инҫетри ют ҫӗршывсенче пулса иртекен пулӑмсем ҫинчен вӑхӑтра тата тӗрӗс пӗлсе тӑраҫҫӗ.
Пирӗн мухтанмалӑх пур. Кӑҫал Чӑваш Ен радиовӗ хӑйӗн 90 ҫулхи юбилейне паллӑ тӑвать, Чӑваш Ен Наци радиовӗ вара 7 ҫул тултарчӗ. Чӑваш Ен Наци радиовне, Тӑван радиона тата Чӑваш Ен радиовне пирӗн республикӑра кӑна мар, ун тулашӗнче те лайӑх пӗлеҫҫӗ. Вӗсен пархатарлӑ ӗҫне пула чӑваш диаспоринчи йӑхташсем эфира тӑван чӗлхепе тухакан программӑсене итлеме тата регионта пулса иртекен мӗнпур пулӑм ҫинчен пӗлме пултараҫҫӗ. Республикӑра цифра телевиденине аталантарас ӗҫ хастарлӑн малалла тӑсӑлать. Чӑваш Ен Наци телевиденийӗ те хӑйӗн хыпарлав анлӑхне пысӑклатса пырать.
Паян пирӗн пурнӑҫа мобильлӗ ҫыхӑнусӑр куҫ умне ӳкерме те йывӑр. Чӑваш Енре республикӑн пӗтӗм территоринех шанчӑклӑ ҫыхӑнупа тивӗҫтерсе тӑракан карас ҫыхӑнӑвӗн 5 пысӑк операторӗ ӗҫлет. Регионта вӗсене ӑнӑҫлӑ аталантарма пулӑшакан хӑтлӑ майсем тата конкурентлӑ хутлӑх йӗркеленӗ.
Ҫыхӑну отраслӗн тата радиопа телевидени ӗҫченӗсемпе ветеранӗсене кулленхи ӗҫӗшӗн пӗтӗм чунтан тав тӑватӑп.
Эсир халиччен тунӑ ҫитӗнӳсемпе лӑпланса ларас ҫуккине тата ҫыхӑну отрасльне малалла та тухӑҫлӑн аталантарса пырассине ҫирӗппӗн шанса тӑратӑп. Сире ҫӗнӗ ҫутӑ проектсем, телейпе ӑнӑҫу тата ырлӑх сунатӑп!
Чӑваш Республикин Пуҫлӑхӗ М.В.Игнатьев