Чăваш Республикин Пуçлăхĕ Михаил Игнатьев Ачасене хӳтӗлемелли пӗтӗм тӗнчери кун ячӗпе саламлани
Хаклӑ туссем, хисеплӗ ентешӗмӗрсем!
Сире Ачасене хӳтӗлемелли пӗтӗм тӗнчери кун ячӗпе чун-чӗререн саламлатӑп!
Ачасем – пирӗн пуласлӑх! Вӗсем мӗнлерех ҫынсем пулса ҫитӗннинчен, пурнӑҫӑн анлӑ та аслӑ ҫулӗ ҫине мӗнлерех шайри пӗлӳ тата кӑмӑл-сипет пуянлӑхӗн ҫӗклемӗпе тӑнинчен аслӑ Раҫҫейпе пирӗн юратнӑ Чӑваш Енӗн малашлӑхӗ килет.
Амӑшлӑхӗпе ачалӑха сыхласси, ҫитӗнекен ӑрӑва тӗрлӗ енлӗн аталантармалли майсем туса парасси патшалӑх политикин тӗп ҫул-йӗрӗсем шутланаҫҫӗ. Пулас ача амӑшӗсене эпир пепке ҫураличченех пулӑшма тата тимлӗх кӳме тӑрӑшатпӑр, ача ҫут тӗнчене сывӑ та савӑнӑҫлӑн килтӗр тесе мӗн кирлине пурне те тӑватпӑр.
Чӑваш Енре виҫӗ ҫултан аслӑрах пепкесен ача сачӗсенчи черет ыйтӑвне туллин татса панӑ, муниципалитетсен 60 процентӗнче ҫулталӑк ҫурӑран аслӑрах мӗнпур пепкене шкулчченхи вӗренӗве явӑҫтарнӑ.
Чӑваш Енри шкул вӗренӗвӗн тытӑмне ҫӗршыври чи тухӑҫлисенчен пӗри тесе йышӑннӑ. Республикӑра Раҫҫейри чи лайӑх 500-топ шкул, ялти чи лайӑх 200-топ шкул шутне кӗртнӗ шкулсен йышӗ ҫулсерен ӳсет.
Чӑваш Ен ҫӗнӗ шкулсем тӑвакан тата хута яракан Раҫҫейӗн йышлах мар регионӗсенчен пӗри. 2016 ҫулта эпир пӗтӗмӗшле шкул вӗренӗвӗн тытӑмне лайӑхлатмалли пӗтӗм Раҫҫейри анлӑ программӑна пурнӑҫлас ӗҫе хутшӑнтӑмӑр. Ҫывӑх ҫулсенче республикӑри хуласемпе ялсенче 32 яхӑн шкула ҫӗнетме тата ҫӗнӗрен тума палӑртатпӑр.
Чӑваш Ен ҫавӑн пекех шкулчченхи вӗренӳ тытӑмне аталанарас, физкультурӑпа тата спортпа хутшӑнма майсем туса парас енӗпе те малта пыракан регион шутланать.
Ашшӗ-амӑшӗ ачисен ырӑ малашлӑхне ҫирӗппӗн шанать. Ҫакна халӑх йышӗ ӳсни те, ӑна республикӑра тӑваттӑмӗш ҫул шанчӑклӑн шута илетпӗр ӗнтӗ, нумай ачаллӑ ҫемьесен шучӗ пысӑкланни те ӗненмелле ҫирӗплетеҫҫӗ.
Хаклӑ туссем! Чӑваш халӑхӗн Аслӑ Вӗрентекенӗ Иван Яковлевич Яковлев ҫапла палӑртнӑ: «Воспитани тӗллевӗ – ҫын телейӗ, воспитани мелӗ – савӑнӑҫ». Пирӗн ҫак халала асра тытса хамӑрӑн ачасем телейлӗ, ӑнӑҫуллӑ, ҫирӗп тӗллевлӗ тата килӗшӳллӗ пулччӑр тесе мӗн кирлине пурне те тумалла.
Чӑваш Ен Пуҫлӑхӗ М.В. Игнатьев
