Чăваш Республикин Пуçлăхĕ Михаил Игнатьев Тавралӑха сыхламалли пӗтӗм тӗнчери кун ячӗпе саламлани
Хисеплӗ ентешӗмӗрсем!
Сире Тавралӑха сыхламалли пӗтӗм тӗнчери кун ячӗпе чун-чӗререн саламлатӑп!
Раҫҫей ҫут ҫанталӑк пуянлӑхӗсем ҫӗршыв тулашӗнче те мухтава тивӗҫнӗ. Пирӗнтен кашнин тӗллевӗ – вӗсене килес несӗлсем валли сыхласа хӑварасси, ҫамрӑк ӑрӑва ҫут ҫанталӑка упрама, хамӑрӑн планетӑшӑн тӑрӑшма вӗрентесси.
Чӑваш Республикин патшалӑх политикин тӗп ҫул-йӗрӗ экологи хӑрушсӑрлӑхне тивӗҫтересси тата ҫут ҫанталӑка сыхласси шутланать. Чӑваш Ен экологи лару-тӑрӑвӗ тӗлӗшӗнчен Раҫҫейри лайӑх регионсен шутне кӗрет. «Раҫҫей Федерацийӗн субъекчӗсен экологи рейтингӗнче» Чӑваш Ен Раҫҫей Федерацийӗнчи 85 субъект хушшинче 7-мӗш вырӑнта тӑрать.
Ҫут ҫанталӑкпа пӗлсе тата вырӑнлӑ усӑ курасси ҫине тимлӗн пӑхатпӑр, вӑрмансенче пушар хӑрушсӑрлӑхне тивӗҫтеретпӗр, вӑрмансем лартса ӳстерес тата вӗсене ҫӗнетес енӗпе ӑнӑҫлӑ ӗҫлетпӗр, кӳлӗсемпе пӗвесен тата сывлӑш тӑрӑмне тӗрӗслесе тӑратпӑр, территорисене тӗрлӗ ҫӳп-ҫапран тасатас тӗлӗшпе массӑллӑ акцисем йӗркелесе ирттеретпӗр.
Йӑлари хытӑ каяшсене тирпейлемелли тытӑм хӑйӗн ӗҫне тӑтӑшах лайӑхлатса пырать. Паян вӑл хальхи вӑхӑтри чи ҫӗнӗ стандартсене тивӗҫтерет. Пӗлтӗр ҫӳп-ҫапа сортламалли комплекспа тивӗҫтернӗ йӑлари хытӑ каяшсен полигонӗ хута кайрӗ, вӑл регионта пухӑнакан коммуналлӑ каяшсене ҫӗр процент чухлех тирпейлеме пултарать. Каяшсене тыткаламалли тытӑма ҫӗнетес ӗҫӗн малаллахи тапхӑрӗ ҫӳп-ҫапа пушатса тиекен станцисем тӑвасси пулӗ. Ҫакӑ проекта пурнӑҫланӑран пулакан экологи эффектне вӑйлатать.
Ҫак уяв кунӗнче хӑйӗн пурнӑҫне тавралӑха сыхлас ӗҫпе ҫыхӑнтарнӑ ҫынсене, ҫавӑн пекех пирӗн планета пуласлӑхӗпе кӑсӑкланакан, тӑван ҫӗр ырлӑхӗшӗн тӑрӑшакан общество организацийӗсен представителӗсемпе ахаль граждансене пӗтӗм чунтан тав тӑватӑп. Пуҫаруллӑ пулнӑшӑн, Чӑваш Ен ырлӑхӗшӗн тӑвакан ӗҫӗршӗн тайма пуҫ.
Сывлӑх, телей, мӗнпур ырӑ пуҫарура ӑнӑҫусем сунатӑп!
Чӑваш Республикин Пуҫлӑхӗ М. Игнатьев