Чăваш Республикин Пуçлăхĕ Михаил Игнатьев Ҫемье, юрату тата шанчӑклӑх кунӗ ячӗпе саламлани
Хисеплӗ ентешсем!
Сире Ҫемье, юрату тата шанчӑклӑх кунӗ ячӗпе чун-чӗререн саламлатӑп!
«Кил-йышра телейлӗ этем чӑннипех ӑраскаллӑ ҫын», – тесе ҫырнӑ вырӑс литературин классикӗ Лев Толстой. Ҫирӗп ҫемье – пысӑкран та пысӑк пуянлӑх, вӑл пире тӗрлӗ йывӑрлӑхсенчен хӳтӗлет, пурнӑҫ савӑнӑҫне парнелет, пирӗншӗн пуриншӗн те шанчӑклӑ тӗрек пулса тӑрать. «Йывӑҫ тымарӗпе ҫирӗп, этем – ҫемьепе»,– тесе халӑхра ахальтен каламаҫҫӗ.
Аслӑ ҫутта кӑлараканӑмӑр Иван Яковлев пире ҫемьене темрен хаклӑ тупра пек сыхласа упрама халалласа хӑварнӑ. Унӑн пилне пирӗн ентешсен чылай ӑрӑвӗ чыслӑн пурнӑҫласа пырать. Ачасене пӑхса ҫитӗнтерес тата ҫемье йӑлисене ҫирӗплетес енӗпе тунӑ тава тивӗҫлӗ ӗҫсемшӗн Раҫҫей Президенчӗн Указӗпе кӑҫал республикӑри харӑсах ултӑ нумай ачаллӑ ҫемьене «Ашшӗ-амӑшӗн мухтавӗ» орден медалӗпе наградӑланӑ.
Власть органӗсемпе общество организацийӗсен пӗлтерӗшлӗ тӗллевӗ – ҫемьен пӗтӗмӗшле хаклӑхӗсене, унӑн социаллӑ хӳтлӗхне малалла та ҫирӗплетесси, халӑх пурнӑҫӗн пахалӑхне лайӑхлатасси.
Ҫемьепе ачасен интересӗсене тӗпе хуракан патшалӑх политикине пурнӑҫлас тӗлӗшпе комплекслӑн тата тухӑҫлӑ ӗҫленине пула пӗлтӗр пирӗн республика Раҫҫей Федерацийӗнче ачасене ҫемьесене вырнаҫтарассипе малта пыракансен йышне тата ачасемшӗн пурӑнма лайӑх майсем туса панӑ чи ӑнӑҫлӑ регионсен пӗрремӗш теҫеткине кӗчӗ. Тӑлӑх ачасем хӑйсене чӑннипех юратакан ҫемьесене пурӑнма куҫнине пула пирӗн ҫавнашкал ачасен виҫӗ интернат-ача ҫурчӗ хупӑнчӗ. Унсӑр пуҫне, юлашки ҫулсенче нумай ачаллӑ ҫемьесен шучӗ 35 процент чухлӗ ӳсрӗ, уйрӑлусен йышӗ палӑрмаллах чакрӗ.
Чӑваш Енре пӗчӗк ачасем вилессин шайӗ Раҫҫейри регионсем хушшинче чи пӗчӗкки шутланать, вӑл малта пыракан Европа ҫӗршывӗсен тата Японин кӑтартӑвӗсемпе пӗр шайра. Сывӑ ачасен хисепӗ вара ҫулран-ҫул ӳссе пырать.
Хаклӑ туссем! Сире пурсӑра та пӗтӗм чунтан ырлӑхпа телей, малашлӑха ҫирӗп шанчӑкпа пӑхма сунатӑп. Сирӗн килӗрте яланах юратупа савӑнӑҫ хуҫаланччӑр, ача-пӑчан хаваслӑ кулли янӑраса тӑтӑр!
Чӑваш Республикин Пуҫлӑхӗ М.Игнатьев