Чӑваш Ен Пуҫлӑхӗ Михаил Игнатьев Ял хуҫалӑхӗпе тирпейлекен промышленноҫ ӗҫченӗн кунӗ ячӗпе саламлани
Агропромышленноҫ комплексӗн хисеплӗ ӗҫченӗсем тата ветеранӗсем!
Сире професси уявӗпе – Ял хуҫалӑхӗпе тирпейлекен промышленноҫ ӗҫченӗн кунӗ ячӗпе чун-чӗререн саламлатӑп!
Эсир пурсӑмӑра та тӑрантаракан ҫӗр-аннемӗре тивӗҫлипе пӑхса тӗрӗс-тӗкел упрассишӗн пӗтӗм вӑйӑра тата чун хавалне шеллемесӗр тӑрӑшатӑр, ырми-канми ӗҫӗрпе экономикӑна аталантарма ҫирӗп никӗс хыватӑр, халӑха лайӑх пахалӑхлӑ тата экологи тӗлӗшӗнчен таса шутланакан продукципе тивӗҫтеретӗр.
Хальхи вӑхӑтри технологисене алла илни, ял хуҫалӑхне ӑнӑҫлӑн ҫӗнетсе пыни ӗҫ ӳсӗмлӗхне пысӑклатма, ял хуҫалӑх производствин тухӑҫлӑхне тата продукци пахалӑхне ӳстерме пулӑшаҫҫӗ. Кӑҫал отрасль ӗҫченӗсен тӑрӑшулӑхне пула тӗш тырӑсемпе пӑрҫа йышши культурӑсен рекордлӑ тухӑҫне пухса кӗртнӗ.
Чӑваш Енре агропромышленноҫ комплексӗн ӗҫченӗсем валли хӑтлӑ майсем туса парасси ҫине тимлӗн пӑхатпӑр. Ял территорийӗсене ҫирӗппӗн аталантарма, производство культурине ӳстерме, ялӑн общество инфратытӑмне лайӑхлатма тата ялта пурӑнакансене социаллӑ пулӑшу пама ҫулсерен чылай пысӑк укҫа-тенкӗ уйӑратпӑр.
Отрасль ветеранӗсемпе хастар ӗҫченӗсене хӑйсем суйласа илнӗ хресчен ӗҫне юратнӑшӑн, ӗҫри ӑнӑҫусемпе ҫитӗнӳсемшӗн чун-чӗререн тав тӑватӑп. Сире хисеплесе чунтан тав тунине туллин палӑртма, пурсӑра та ҫирӗп сывлӑх, ырлӑх тата вӑрӑм ӗмӗр сунма ирӗк парсамӑр!
Чӑваш Республикин Пуҫлӑхӗ Михаил Игнатьев
