Раштав  уйăхĕн 8-мĕшĕнче Чăваш Республикин Пуҫлăхĕ Михаил Игнатьев хăйĕн мăшăрĕпе Лариса Юрьевнăпа Чăваш Республикинче Амăшĕ тата Ашшĕн ҫулталăкне халалласа ирттернĕ савăнăҫлă мероприятине хутшăннă.

Паллă пулăма Чăваш Республикин Патшалăх Канашĕн Председателĕн тивĕҫĕсене вăхăтлăх пурнăҫлакан Альбина Егорова, Чăваш Республикин ĕҫпе социаллă хӳтлĕх министрĕ Сергей Димитриев, Шупашкар епархийĕн викарийĕ – Игнатий епископ, «Хĕрарăмсен пĕрлешĕвĕ» Чăваш Енри обществăлла организацийĕн председателĕ Алевтина Федорова, ҫак организацийĕн ҫумĕнчи Ашшĕсен канашĕн председателĕ Алексей  Мурыгин, ҫемье конкурс ҫĕнтерӳҫисем пуҫтарăннă.     

«2017-мĕш ҫула Раҫҫейре Экологи ҫулталăкĕ тесе йышăннă, Чăваш Республикинче Амăшĕн тата Ашшĕн ҫулталăкĕ тесе палăртнă.  Ҫак икĕ пулăм, ят пĕр-пĕринпе питĕ тачă ҫыхăнса тăраҫҫĕ. Халăхăн ҫутҫанталăка упрасси, ҫемье туприне тытса пырасси тĕп тĕллевсенчен пĕри», - тесе уйрăммăн палăртса каланă Чăваш Ен Пуҫлăхĕ Михаил Игнатьев.  

Регион Пуҫлăхĕ ҫемье ăнлава хăпартса пырасси, наци культурипе йăли-йĕркине пăхăнса пурăнасси – патшалăх политикин тĕп ҫул-йĕрĕсем пулса тăраҫҫĕ тенĕ. «Пирĕн тĕллев – ҫамрăксене тĕрĕс-тĕкел тӳрĕ ҫул ҫине тăма вĕрентесси.  Шăпах та, ҫак ăнлавсем ҫемьере аслисене хисеплеме, ҫитĕнекен ăрăва тĕрĕс ҫулпа утма вĕрентесси пулать те.   Ҫирĕп ҫемьесенче сывă ачасем ҫитĕнеҫҫĕ, вĕсем телейлĕ пулни те куҫкĕретех.  Ҫемье пуянлăхне упрамаллине пире ҫутта кăлараканăмăр, Иван Яковлев та пехиллесе хăварнă», - тесе каланă вăл сăмаха малалла тăснă май.   

Регион Ертӳҫи Амăшĕпе Ашшĕн ҫулталăкне халалласа сахал мар республикăра мероприятисем иртнине палăртнă.  Ҫак ĕҫе уйрăмах обществăлла организацисем хастар хутшăннине пĕлтернĕ.

Чи пысăк ҫитĕнӳсем пирки те чарăнса тăнă Михаил Игнатьев. Республикăра ҫемье ҫавăракансен йышĕ ӳссе пыни пурсăмăра та хавхалантарать, кăтарту  пĕлтĕрхинчен 8 процент хăпарнине асăннă вăл.

Сăмаха май, патшалăх уйăракан социаллă пулăшусем пирки те чарăнса тăнă.

Ачаллă ҫемьесене пулăшу пама  виҫĕ ҫул валли йышăннă бюджетра 5,5 млрд пăхса хăварнине каланă.

РФ Президенчĕ Владимир Путин витĕмлĕхĕпе, 2018-мĕш ҫултан пуҫласа ҫемьере виҫҫĕмĕш ача ҫуралнисем уйăхсерен патшалăх пулăшăвне тивĕҫĕҫ.

Раҫҫей Президенчĕн пуҫарăвĕпе килĕшӳллĕн, ҫемьере пĕрремĕш ача ҫуралнăшăн та уйăхсерен укҫа куҫасси паллă, 2021-мĕш ҫулччен амăшĕн капиталне тӳлеме йышăннă.  Чи пахи – Чăваш Республикин Пуҫлăхĕ «Амăшĕн мухтавĕ» хисеплĕ паллă пирки патшалăх наградине пама пăхса хăварни, ĕҫ хутне те алă пусса ҫирĕплетнĕ.

Кун пек ĕҫсене пурнăҫлани, малашлăхра тата та ача ҫураласлăхĕн кăтартăвĕ ӳсме пултарассине ҫирĕплетет.  «Мĕнпур ҫемьесенче яланах юрату, килĕшӳ, ăнланулăх хуҫалантăр. Сывă та тĕрĕс-тĕкел ачасем ҫитĕнччĕр», - тесе каланă Михаил Игнатьев.

Ҫемье конкурсĕн пĕтĕмлетĕвĕсем тăрăх, «Туслă ҫемье» номинацире Тимонинсен ҫемьи мала тухнă.  Вĕсен ҫемьинче 10 ача ӳсет, 22 ҫул пĕрле килĕштерсе пурăнаҫҫĕ.  «Социаллă яваплăха туякан ҫемье»  номинацире Устиновсене ҫитекенни пулман. «Спортпа туслă ҫемье» номинацире Павловсем мала тухнă. «Пултаруллă ҫемье» номинацире Анисимовсем, «Ĕҫчен ҫемье» номинацире Ершовсене ҫитекенни пулман.  

Ҫулталăкри Ҫемье ҫĕнтерӳҫи ята Львовсем ҫĕнсе илнĕ.

Чăваш Республикин Патшалăх Канашĕн Председателĕн тивĕҫĕсене пурнăҫлакан Альбина Егорова ҫапларах каланă: «Аннепе Атте ҫулĕ ачасене тĕрĕс ҫул ҫине тăратма витĕм кӳрет.  Ашшĕ-амăшĕн пехилĕ ачасене ҫитсе пырать. Вĕсем ҫав тери хаклă пуриншĕн те.  Ачасем ҫемьесенче пуҫтарнă ăнлавсемпе хăйсем ҫитĕнсен, ҫемье ҫавăрсан, усă курма пуҫласси те куҫкĕретех», - тенĕ вăл, ҫемьесене патшалăх пулăшăвĕпе тивĕҫтересси яланах малти вырăна тухса тăнине каланă. Чăваш Республикин Патшалăх Канашĕ республика Правительствипе пĕрле хар тăрса, РФ Президенчĕн йышăнăвĕсене пурнăҫа кĕртсе пырассишĕн ҫине тăрсах ĕҫлессине палăртнă сăмаха пĕтĕмлетнĕ май.  

Мероприяти уяв концерчĕпе вĕҫленнĕ.  

Фоторепортаж