Чăваш Республикин Пуçлăхĕ Михаил Игнатьев патне Раççей Федерацийĕнчи Куба Республикин Чрезвычайлă тата Полномочиллĕ Посолĕнчен  Эмилио Лосада Гарсияран Тав çырăвĕ килсе çитнĕ. Çырура вăл ятарлă делегацине Чăваш Енре нарăс уйăхĕн 18-мĕшĕнче ырă кăмăлтан чаплă кĕтсе илнĕшĕн тав тăвать. «Тĕлпулусем усăллă тата пысăк пĕлтерĕшлĕ пулчĕç пирĕншĕн.  Куба Республикипе Чăваш Республики хушшинчи çыхăнăва малашне те тытса пырса, пĕрне-пĕри усăллă канашсемпе, сĕнӳсемпе пулăшса пырассине шанатпăр.  Медицина тытăмĕнче анчах мар, экономикăн ытти сферисене те аталантарса пыма тăрăшăпăр», - тенĕ çырура.

Раççей Федерацийĕнчи Куба Республикин Чрезвычайлă тата Полномочиллĕ Посолĕ Чăваш Республикин Пуçлăхне Гаванăри халăхсем хушшинче иртекен «FINAL-2017»  мероприятине йыхравлать.

Аса илтеретпĕр, РФ Куба Республикин Чрезвычайлă тата Полномочиллĕ Посолĕ нарăс уйăхĕн 18-мĕшĕнче Чăваш Республикинче официаллă визитпа пулнă. Тĕлпулусем вăхăтĕнче Чăваш Республикин Пуçлăхĕ Михаил Игнатьев тата Эмилио Лосада Гарсия пĕр-пĕринпе тачă çыхăнса ĕçлесси пирки калаçса килĕшнĕ. Сумлă хăнасем ĕçлĕ визитпа килнĕ чухне Шупашкарта  вырнаçнă тĕрлĕ объектсене çитсе курнă, вĕсен ĕçĕсемпе тĕплĕн паллашнă.