Удмурт Республикин влаç органĕсенче ĕçлекенсемпе Чăваш Республикин Правительствин командисем хушшинче хоккей выляссипе юлташла спорт ăмăртăвĕсем иртнĕ
Пуш уйăхĕн 16-мĕшĕнче Шупашкарта Пăр керменĕнче Удмурт Республикин влаç органĕсенче ĕçлекенсемпе Чăваш Республикин Правительствин командисем хушшинче хоккей выляссипе юлташла спорт ăмăртăвĕсем иртнĕ.
Ăмăртăва уçнă май Михаил Игнатьев Раççей Президенчĕ Владимир Путин каланă сăмахсене аса илнĕ. Енчен те çын спортпа туслă, сывă пурнăç йĕркине пăхăнса пурăнать пулсан, пурнăçра яланах ăнăçлă тесе каланă. «Хоккей вăййисене чăн-чăн арçынсем, хăюллисем выляççĕ. Эсир хăвăрăн тĕслĕхĕрсемпе çитĕнекен ăрăва спорта явăçтарма пулăшатăр. Паян сире ытларах пĕрне пĕри савăк кăмăл парнелеме, çĕнтерӳ тума сĕнетĕп», - тенĕ Михаил Игнатьев.
Чăваш Республикин Патшалăх Канашĕн Председателĕ Валерий Филимонов хăйĕн сăмахĕнче, хоккей выляма юратакан çынсене Раççей историне, спорта юратма пĕлни пĕрлештернине асăннă.
«Эпир тĕнчене спорта çӳреме нихăçан та кая мар тенине çирĕплетсе паратпăр. Пире уйрăмах Шупашкарта çакăн пек пысăк Спорт керменне хута яни хавхалантарать. Регионта спорта аталантарассипе сахал мар укçа-тенкĕ тăкакланине хамăр куçпа курса ĕнентĕмĕр», - тенĕ Удмурт Республикин Патшалăх Канашĕн Председателĕ Владимир Невоструев.
Аса илтерсе хăваратпăр, Чăваш Ен Правительствин хоккей командине нумаях пулмасть йĕркелесе янă. Унăн йышĕнче: Чăваш Ен Пуçлăхĕ Михаил Игнатьев, Чăваш Республикин Министрсен Кабинечĕн Председателĕ Иван Моторин, ĕç тăвакан влаç органĕсен ертӳçисем, Чăваш Республикин Патшалăх Канашĕн депутачĕсем, республика Пуçлăхĕн Администрацийĕн ĕçченĕсем.
