Чăваш Республикин Пуçлăхĕ Михаил Игнатьев РФ Президенчĕн Атăлçи федераци округĕнчи полномочиллĕ представителĕн çумĕсемпе Олег Мельниченкопа тата Игорь Паньшинпа ĕçлĕ тĕлпулу ирттернĕ
Пуш уйăхĕн 24-мĕшĕнче Чăваш Республикин Пуçлăхĕ Михаил Игнатьев РФ Президенчĕн Атăлçи федераци округĕнчи полномочиллĕ представителĕн çумĕсемпе Олег Мельниченкопа тата Игорь Паньшинпа ĕçлĕ тĕлпулу ирттернĕ. Сумлă ертӳçĕсем чăваш çĕрĕ çине РФ субъекчĕсен Атăлçи федераци округне кĕрекен регионсенчи патшалăх влаçĕн представительлĕ органĕсен Ассоциацийĕн XLIX-мĕш ларăвне хутшăнма килсе çитнĕ.
Олег Мельниченко хăйĕн сăмахĕнче, Ассоциаци саккунсемпе тĕрлĕ шайра ĕçлекенсене пĕтĕмĕшле пĕрлештерсе тăнине асăннă. «Паян çамрăксене тĕрĕс-тĕкел çитĕнтерсе патриотла воспитани парас ыйтăва анлăн сӳтсе явăпăр. Пире креативлă çамрăксем, хăйсен пурнăçне Раççейпе çыхăнтарма пĕлекен яшсемпе хĕрсем кирлĕ», - тенĕ вăл.
Игорь Паньшин республикăра пурнăçа кĕрекен çĕнĕ проекта ырланă. Совет Союзĕн Геройĕ А.В.Кочетов ячĕллĕ кадетсен корпус ĕçне пуçланине лайăхпа палăртнă, вăл Атăлçи федераци тăрăхĕшĕн пысăк пĕлтерĕшлĕ пулнине каланă.
«Регион шайĕнче бюджетра çак объекта хăпартса лартма пысăк укçа-тенкĕ уйăрнă. Вăл хăех пысăк хисепе тивĕç. РФ Президенчĕн Атăлçи федераци округĕн полномочиллĕ представителĕ Михаил Бабич çак ыйту çине пысăк тимлĕх уйăрать», - тенĕ Игорь Паньшин.
Чăваш Ен Пуçлăхĕ проекта пурнăçа кĕртме «çул-йĕр карттине» пăхса тухнине пĕлтернĕ. 2018-мĕш çулта çĕнĕ вĕренӳ çулĕ тĕлне объекта пурнăçа кĕртме тĕллев лартнă.
Палăртма кăмăллă, пирĕн регионта 1968-мĕш çултан пуçласа «Зарница» тата «Орленок» çар вăййисене кулленех кашни çулталăкрах йĕркелесе ирттереççĕ, ытти субъектсемшĕн тĕслĕх вырăнĕнче тесен те йăнăш мар.
Паянхи ларăвăн кун йĕркине кĕртнĕ тепĕр ыйту – йăлари хытă каяшсене тирпейлесе пуçтарассипе йышăннă саккунсен йĕркисене тишкересси. Экологи çулталăкĕнче уйрăмах çак ыйту пысăк пĕлтерĕшлĕ. РФ Президенчĕ Владимир Путин ăнсăртран мар пулĕ ку тĕлĕшпе ятарлă документа алă пусса çирĕплетнĕ. Пирĕн регионта çӳп-çапа тирпейлесе пуçтармалли объект хута кайнă. Унăн ĕçĕпе РФ регионĕсем тăтăшах паллашаççĕ. РФ субъекчĕсем хушшинче Чăваш Республики экологи тĕлĕшĕнчен чи таса регион пулса тăрать. Паллах, республикăра тата та ытти пысăк проектсем пурнăçа кĕреççĕ.
Паян Игорь Паньшин «iВолга» çамрăксен форумĕнче гранта тивĕçнĕ çамрăксемпе тĕл пулнă. Паллă пулăма Чăваш Республикин Министрсен Кабинечĕн Председателĕн çумĕ – Чăваш Республикин Пуçлăхĕн Администрацийĕн Ертӳçи Юрий Васильев хутшăннă. Çамрăксем хăйсемпе паллаштарнă, пуçаруллă проектсем пирки чарăнса тăнă. Игорь Паньшин хăйĕн сăмахĕнче, Атăлçи федераци округĕнче çамрăксене тĕрлĕ грантсемпе тивĕçтерме 9 млн уйăрнине пĕлтернĕ.
