Пуш уйăхĕн 24, 25-мĕшĕсенче конгресс тăрăшнипе чăваш халăх культурине, йăли-йĕркине сума сăвакансемшĕн чăннипех те пысăк пĕлтерĕшлĕ уявсем пулчĕç. Чăваш наци конгресĕ регионсем хушшинче йĕркеленĕ "Чăваш тумĕ - халăх пуянлăхĕ" тата кăçалхипе вунсаккăрмĕш хут иртекен "Кĕмĕл сасă" конкурс- фестивальсен пĕтĕмлетĕвĕсем анлă та курăмлă шавласа иртрĕç.

Пĕрремĕш кунне Шупашкарти культурăпа ÿнер искусствисен институтĕнче чăваш тумĕн уявне йĕркелерĕç. Ирхине 11 сехетре кунти фойере конкурсăн районти тапхăрĕн çĕнтерÿçисем, регионсенчи наципе культура автономийĕсен конкурсĕсенче çĕнтернĕ хастарсем тĕлĕнмелле пуян та паха курав йĕркелерĕç. Крым, Сарă ту, Самар, Пенза, Пушкăрт, Оренбург, Чĕмпĕр тата ытти тăрăхĕсенчен килнĕ ăстасемпе хастарсем хăйсен енчи чăваш тумĕсемпе паллаштарчĕç.

Куç алчăраса каймалли чăвашлăх илемĕ: тенки, хушпăвĕ, масмакĕ, тĕрлĕ улача кĕпи, чапчушки тата ытти авалхи чăваш эрешĕсемпе тумĕсем курма килнĕ халăха тĕлĕнтерчĕç. Чăн та, 19-мĕш ĕмĕрхи сурпансене, пир кĕпесене, кĕмĕлĕсене епле сыхласа хăварма май килтернĕ-ши пирĕн тăван халăх? Кун пек пуян курав хăçан тата ăçта пулнă-ши тесе ыйтас килет. Тата çак тумсене, капăрсене пĕтĕмпех алăпа, чĕпкуç çутипе ăсталанине ĕненес те килмест...

Чăваш наци конгресĕн 25 çулне тата конгресс çумĕнчи ал-ĕç ăстисен Ассоциацийĕ 10 çул тултарнине халалланă "Чăваш тумĕ -халăх пуянлăхĕ" конкурс пĕтĕм чăваша ура çине тăратрĕ темелле. Ку енĕпе конгресăн йĕркелÿ комитечĕн хастарĕсем: Зинаида Воронова, Нина Андреева, Раиса Васильева, Вера Архипова, Елена Малина, Лидия Константинова тата ыттисем те чунне парса ĕçлерĕç темелле.

Чăваш наци конгресĕн президенчĕ Николай Угаслов куравпа паллашнă май, тăван халăхăн пуянлăхĕпе - тумĕн хăйнеевĕрлĕхĕпе тĕлĕнсе кăна тăчĕ. Кашни асанне-асатте арчинчен кăларнă тупра çинчен тĕплĕнрех пĕлме тăрăшрĕ вăл. Оренбург тăрăхĕнчи чăвашсен авалхи çи-пуçĕ, Крымра пурăнакан Любовь Тавлуй илсе килнĕ чăваш тумĕсем, Сарă туран килнĕ Ваççа пиччен çăпатисем, пурте кăсăклă та авалхи чăвашсен историне уçса паракан япаласем.

Кăнтăрла иртсе пĕр сехетре институтăн сцени çинче Чăваш Ен районĕсенчен тата регионсенчен çитнĕ ăстасемпе хастарсем хăйсем илсе килнĕ тумсем çинчен каласа парассипе ăмăртрĕç.

Чăваш тĕрри çинчен илемлĕн ăнлантарса парассипе Хĕрлĕ Чутай районĕнчен килнĕ Зинаида Черновăна çитекен пулмарĕ. Елчĕк тăрăхĕнчи Татьяна Лявина наци тумĕн илемĕсем номинацире пĕрремĕш пулчĕ. ЧНК Хĕрлĕ Чутай уйрăмĕ "Чăваш тумĕн уйрăм пайĕсем" номинацире çĕнтерчĕ.

"Чăваш наци тумĕ" номинацире Шупашкар районĕнчен килнĕ Галина Павловăна никам та çитеймерĕ. Канаш районĕнчен килнĕ хастарсем вара автор коллекцийĕсемпе чи мала тухрĕç.

Чăваш наци тумне перекетлесе упранă, вĕсен хакне чи мала хурса хисепленĕ чăваш хастарĕсене ЧНК тусĕсем-спонсорсен парнисемпе тата дипломсемпе чысларĕç.

Пуш уйăхĕн 25-мĕшĕнче чăваш тумĕн уявĕ филармони залне куçрĕ. Кунти фойере ирех чăваш халăх тумĕ тăхăннă ватти-вĕтти курава малалла тăсрĕ. Кунта нумайрах авалтан сыхланса юлнă кĕмĕлпе илемлетнĕ чăваш тумĕсем тата хальхи авторсен коллекцийĕсем вырăн тупрĕç.

Чăваш Республикин Культура министрĕ Константин Яковлев, Мускаври Федераллă чăваш автономийĕн президенчĕ, Раççей Патшалăх Думин депутачĕ Леонид Черкесов, ЧНК президенчĕ Николай Угаслов, Чăваш Ен халăхĕсен Ассамблейин Канашĕн председателĕ Лев Кураков "Чăваш тумĕ -халăх пуянлăхĕ" регионсем хушшинчи конкурсăн пĕтĕмлетÿ куравне питĕ пысăк хак пачĕç. Малашне çакнашкал пĕлтерĕшлĕ мероприятисене ятарлă проект Гранчĕпе йĕркелемеллине палăртрĕç вĕсем.

"Кĕмĕл сасă" фестиваль çĕнтерÿçисемпе пĕрлех филармони залĕн сцени çинчен "Кĕмĕл тумлă" чăвашсем те , "Чăваш тумĕ - халăх пуянлăхĕ" конкурсăн тĕрлĕ номинаци çĕнтерÿçисем хаклă парнесемпе дипломсене тивĕçрĕç.

Уяв чăннипех те уявла кăна мар, аваллăхпа малашлăха пĕрлештерекен пулăм пулса тăчĕ.

ЧНК пресс-службин ертÿçи Зоя Яковлева