Чăваш Республикин Пуçлăхĕ Михаил Игнатьев Вырӑнти хӑй тытӑмлӑх кунӗ ячӗпе саламлани
Вырӑнти хӑй тытӑмлӑх органӗсен хисеплӗ ӗҫченӗсем тата муниципалитет службин ветеранӗсем!
Уяв ячӗпе чун-чӗререн саламланине йышӑнсамӑр!
Эсир халӑха ҫывӑхарах тӑракан влаҫ сыпӑкӗ шутланатӑр. Ҫынсем пурнӑҫра хӑйсене мӗнлерех туясси, территорисен инфратытӑмĕпе экономикине аталантарасси, тирпей-илем кӗртес ыйтӑвӗсене татса парасси, пурӑнма хӑтлӑ майсене малалла лайӑхлатасси ытларах чухне шӑпах сирӗн ӗҫ тухӑҫлӑхӗнчен килет.
Вырӑнти хӑй тытӑмлӑх органӗсем Чӑваш Ен Правительствипе пӗрле пысӑк ӗҫ тӑваҫҫӗ, пӗрлехи вӑйпа эпир хамӑрӑн хуласемпе районсене тата та тирпейлӗрех, илӗртӳллӗрех тума тӑрӑшатпӑр. Ку енӗпе федераци, республика тата муниципалитет программисем пысӑк витӗм кӳреҫҫӗ. Республикӑра ача сачӗсемпе шкулсем, фельдшерпа акушер пункчӗсем, ялсенче клубсем тӑвас тата юсаса ҫӗнетес ӗҫ лайӑх пырать, юрӑхсӑра тухнӑ ҫурт-йӗр фондӗнчен ҫынсене урӑх вырӑна пурӑнма куҫарассипе, нумай хваттерлӗ ҫуртсене тӗпрен юсассипе ҫыхӑннӑ программӑсем, экологи проекчӗсем йӗркеллӗн пурнӑҫланаҫҫӗ, картишсене тирпей-илем кӗртес, ҫул-йӗре тата пырса кӗмелли ҫулсене юсас ӗҫсем те аван пыраҫҫӗ.
Ҫав ырӑ пулӑмсене пула юлашки пилӗк ҫулта пурнӑҫ тӑршшӗ виҫӗ ҫул ҫурӑна ҫити пысӑкланчӗ. Нумай ачаллӑ ҫемьесен шучӗ, 2012 ҫулхипе танлаштарсан, чӗрӗке яхӑн ӳсрӗ – 2017 ҫул пуҫламӑшӗ тӗлне 11,5 пине ҫитрӗ. Чӑваш Ен Раҫҫей Федерацийӗн инвестици илӗртӳлӗхӗпе тата экологин лайӑх лару-тӑрӑвӗпе палӑрса тӑракан субъекчӗсен шутне кӗчӗ.
Пирӗн тата нумай ӗҫ тумалла. Пӗрле эпир палӑртса хунӑ пӗтӗм тӗллеве Чӑваш Енре пурӑнакансен ырлӑхӗшӗн ӑнӑҫлӑн пурнӑҫласса шанса тӑратӑп.
Сире чун-чĕререн ҫирӗп сывлӑх, ырлӑх, пӗтӗм ырӑ пуҫарура тата муниципалитетсенче пурӑнакансен пултаруллӑ шухӑшӗсене пурнӑҫа кӗртес ӗҫре ҫитӗнӳсем сунатӑп!
Чӑваш Республикин Пуҫлӑхӗ Михаил Игнатьев