Ака уйăхĕн 26-мĕшĕнче Чăваш Республикин Министрсен Кабинечĕн черетлĕ ларăвĕ иртнĕ. Чи малтанах  республика Пуçлăхĕ Михаил Игнатьев ака уйăхĕн 24-мĕшĕнче Мускавра РФ Ют çĕршыв ĕçĕсен министерствинче Чăваш Республики çинчен анлă презентаци иртни пирки чарăнса тăнă.

 Регион Пуçлăхĕ Михаил Игнатьев РФ Ют çĕршыв ĕçĕсен министерстви тата хăй Ертӳçĕ Сергей Лавров Чăваш Республикин презентаци ĕçне пысăка хакланине пĕлтернĕ. Ют çĕршывсен посолĕсем пирĕн республикăпа çывăхрах паллашма кăмăл тунине палăртнă.  Республика кунĕнче сумлă хăнасем пирĕн региона килсе курасси пирки ырă хыпара каланă.  Чи пахи вара – ют çĕршывсенчи бизнес пĕрлешӳсем регионпа ĕçлĕ çыхăнусене çирĕплетесшĕн.

«Презентаци çав тери кăмăллă иртрĕ.  Ют çĕршывсен посолĕсем пирĕн республикăпа кăсăкланни куçкĕретех.  Регионăн инвестици илĕртӳлĕхĕ пысăк пулнине çирĕплетеççĕ бизнес-пĕрлешӳсен представителĕсем», - тенĕ вăл.    

 Ку хутĕнче Чăваш Республикин Министрсен Кабинечĕн ларăвĕнче пушар хуралĕн ĕçченĕсемпе çыхăннă саккун йĕркине те çĕнĕлĕхсем кĕртсе хăварасси пирки ĕç хутне пăхса тухнă. 

  Çанталăк кунран кун ăшă еннелле сулăнать. Ăна кура Чăваш Республикинче пушара хирĕç кĕрешессипе ятарлă режим йышăннă.  Ĕç хучĕпе килĕшӳллĕн, çуркуннепе çуллахи тапхăрта вăрмансене пачах та çӳреме чармалла, транспорт таврашне те  кĕртме юрамĕ.  Кĕçех çу уйăхĕнчи уявсем çывхарса килеççĕ.  Халăх вăрманта кану йĕркелеме пултарать.  Мĕнпур мероприятисенче пушартан асăрханассипе йышăннă мерăсене пăхăнмалла. Çынсене хыпарсене вăхăтра пĕлтермелле. Енчен те йĕрке пăсакансене тупса палăртсан, явап тыттармаллине асăрхаттарнă Чăваш Республикин Пуçлăхĕ Михаил Игнатьев.  Типĕ çанталăкра вут-кăварпа алхасма юраманнине чĕнсе каланă.