Чăваш Республикин Пуçлăхĕ Михаил Игнатьев Пĕтĕм тĕнчери ачасене хӳтӗлемелли кун ячӗпе саламлани
Хисеплӗ ентешӗмӗрсем!
Сире Пĕтĕм тĕнчери ачасене хӳтӗлемелли кун ячӗпе саламлатӑп!
Ачасем ҫуралнӑ май пирӗн пурнӑҫ ҫӗнелсе улшӑнать, вӑл телейлӗрех те килӗшӳллӗрех пулма тытӑнать, ҫӗнӗ тӗллевпе тулать.
Кашниех хӑйӗн ачи унран лайӑхрах тата пултаруллăрах пултӑр, тивӗҫлӗ ҫын пулса ӳстӗр, Тӑван ҫӗршыв унпа мухтанма пултартӑр тесе ӗмӗтленет. Пирӗн ҫав шанчӑксене тӳрре кӑларма хамӑртан мӗн килнине йӑлтах тумалла.
Чӑваш Ен власть органӗсем ҫамрӑк ӑру хӑйӗн вӑй-халӗпе туллин усӑ курма пултармалли майсене лайӑхлатса пыраҫҫӗ. Республикӑра пысӑк тавракурӑмлӑ ачасемпе тӗллевлӗн ӗҫлеҫҫӗ, ҫамрӑксен инноваци пултарулӑхӗн центрӗсене, ачасен технопаркне йӗркеленӗ, шкул ачисене професси пӗлӗвӗ памалли тата професси суйласа илме пулӑшмалли программӑсем ӑнӑҫлӑн пурнӑҫланаҫҫӗ. Ҫамрӑксене ҫарпа патриот тата ӑс-хакӑлпа кӑмӑл-сипет воспитанийӗ парасси ҫине те тимлӗн пӑхатпӑр.
Ача сачӗсемпе шкулсем тӑвас тата юсаса ҫӗнетес ӗҫ анлӑланса пырать.
Ҫапах та, паллӑ ӗнтӗ, пурнӑҫра пурлӑх енчен пуян пулни кӑна ҫителӗксӗр. Юратнӑ ачӑрсемшӗн чун ӑшшине ан шеллӗр, вӗсене хӑвӑрӑн тӗслӗхӗрпе ырӑ кӑмӑллӑ та тарават пулма, ытти ҫынсене хисеплеме вӗрентӗр.
Мӗнпур ачана Тӑван ҫӗршыва чунтан юратма, телейпе савӑнӑҫ, сывлӑх тата пӗр-пӗрне ӑнланма сунатӑп!
Чӑваш Республикин Пуҫлӑхӗ Михаил Игнатьев
