Чăваш Ен Пуçлăхĕ Михаил Игнатьев Пир-авӑрпа ҫӑмӑл промышленноҫӑн ӗҫченӗсен кунӗ ячӗпе саламлани
Пир-авӑрпа ҫӑмӑл промышленноҫӑн хисеплӗ ӗҫченӗсем тата ветеранӗсем!
Сире професси уявӗ ячӗпе чун-чӗререн саламлатӑп!
Чӑваш Ен ҫӑмӑл промышленноҫӗ – экономикӑн социаллӑ тӗллевлӗ тата нумай профильлӗ отраслӗсенчен пӗри. Вӑл пир-авӑрпа тир-сӑран, мамӑк тирпе атӑ-пушмак таварӗсем туса кӑларакансене пӗрлештерсе тӑрать.
Халӑха кирлӗ тӗрлӗ тавар туса кӑларса отрасль ӗҫченӗсем Раҫҫей рынокне хамӑр ҫӗршыври продукципе тултарас ӗҫе пысӑк тӳпе хываҫҫӗ.
Эпир пир-авӑрпа ҫӑмӑл промышленноҫа кирлӗ шайра аталантарма лайӑх майсем йӗркелес, продукцие вырнаҫтармалли рынока анлӑлатас тӗлӗшпе комплекслӑн ӗҫлетпӗр.
Конкуренци тупӑшӑвӗ ҫивӗчленсе ҫитнӗ лару-тӑрура отрасль предприятийӗсем таварсен ассортиментне анлӑлатаҫҫӗ, производство технологине лайӑхлатаҫҫӗ. Туянакансене туллин тивӗҫтерекен таварсем туса кӑларни предприятисене ҫӗнӗ рыноксене ҫӗнсе илме пулӑшать.
Отрасль умӗнче паян производство калӑпӑшне ӳстерес, промышленноҫ вӑй-хӑватне сыхласа хӑварас тата пысӑк ӑсталӑхлӑ кадрсене ӗҫе явӑҫтарас тӗллевсем тӑраҫҫӗ.
Регионти пир-авӑрпа ҫӑмӑл промышленноҫ ӗҫченӗсен професси ӑсталӑхӗпе ӗҫченлӗхӗ ӑна аталанӑвӑн ҫӗнӗ шайне ҫӗкленме пулӑшасса шанса тӑратӑп.
Отрасль ӗҫченӗсемпе ветеранӗсене тӳрӗ кӑмӑлпа пурнӑҫлакан ӗҫӗшӗн, тӑрӑшулӑхшӑн тата хӑйсен ӗҫне парӑннӑшӑн пӗтӗм чунтан тав тӑватӑп.
Сире аталану, малашлӑхлӑ плансемпе шухӑшсене ӑнӑҫлӑн пурнӑҫа кӗртме, ҫирӗп сывлӑх тата иксӗлми вӑй-хал сунатӑп!
Чӑваш Республикин Пуҫлӑхӗ Михаил Игнатьев
