Оригинал

Çурла уйăхĕн  25-мĕшĕнче Чăваш Республикин Пуçлăхĕ Михаил Игнатьев Чăваш патшалăх оперăпа балет театрĕнче С.Н.Федоров ячĕллĕ «МНТК «Микрохирургия глаза» Шупашкарти филиалне 30 çул çитнине халалласа ирттернĕ торжествăлла мероприятинче пулнă.  Сăмаха май, филиала йĕркелесе яракан Святослав Николаевич Федоров 90 çул тултарнă.

Паллă пулăм ячĕпе мероприятине пухăннисене саламлама Раççей Сывлăх сыхлавĕн министерствин «МНТК «Микрохирургия глаза» им. академика С.Н. Федорова» ФГАУ генеральнăй директорĕ, медицина наукисен докторĕ Александр Чухраев профессор, Святослав Николаевичăн мăшăрĕ Федорова Ирэн Ефимовна,  «Микрохирургия глаза» МНТК Шупашкарти филиалĕнче тăрăшакан ертӳçĕсем тата специалистсем пуçтарăннă.

Мероприятине пухăннисене саламланă май, Михаил Игнатьев офтальмологсем хăйсен ĕçне пысăк професси шайĕнче пурнăçланине пĕр хутчен çеç мар çирĕплетсе панине асăннă. Шупашкарти филиалĕн çитĕнĕвĕнче Святослав Федоровăн тӳпи пысăк пулнине палăртнă. 

Калас пулсан, «МНТК «Микрохирургия глаза» филиалĕсенче паянхи пурнăçпа килĕшсе тăракан мĕнпур операцисене пĕтĕмпех пурнăçланине асăннă.  Раççейе тăтăшах ют çĕршывсенчен халăх хăйсен куçне сиплеме килнине палăртса хăварнă ертӳçĕсем. 

«Сирĕн ĕçĕр темĕнрен те хаклă.  Шупашкарти филиала 1,5 миллион çын хăйсен сывлăхне çирĕплетме пынă, çакăн чухлĕ халăх тĕрлĕ операцисем витĕр тухнă», - тесе каланă республика Пуçлăхĕ.    Сăмаха май, республика Ертӳçи регионта пысăк технологиллĕ медицинăна аталантарас ĕç çине сахал мар тимлĕх уйăрнине каланă. Калăпăр, пĕлтĕр кăна пысăк технологиллĕ медицина пулăшăвне  республикăра пурăнакан 7 пин ытла çын илнĕ.   

Михаил Игнатьев  «Микрохирургия глаза» МНТК Шупашкарти филиалĕн ертӳçине Николай Паштаева  тата унта тăрăшкан специалистсене пурне те çак паллă пулăм ячĕпе ăшшăн саламланă. Малашне те Святослав Николаевич пек ăста пулса, çынсене кирлĕ пек медицина пулăшăвĕпе тивĕçтерессине шанса каланă.

Аса илтеретпĕр, Шупашкарта çурла уйăхĕн 25-26-мĕш кунĕсенче «Фемтосекундные технологии в офтальмологии» Пĕтĕм Раççейри наукăпа практика конференцийĕ иртнĕ. Унта пурĕ çĕршыври 53 субъектран тĕрлĕ представительсем килсе çитнĕ.

Палăртса хăваратпăр, 30 çул хушшинче Шупашкарти филиал ĕçченĕсем 770 наукăпа çыхăннă материалсем пичетлесе кăларнă.

«Святослав Федоров çав тери паха сиплеме пултаракан наука учрежденине йĕркеленĕ.  Кунта каламасăрах паллă, наука вăйлă аталаннă, ушкăн хăйне шанса панă мĕнпур ĕçе пĕтĕм кăмăлтан, таса чунпа яваплăха туйса пурнăçлани никама та иккĕлентермест», - тесе палăртнă Александр Чухраёв пухăннисене саламланă май. Çак 30 çул хушшинче филиалта çĕршыври 78 регинтан халăх медицина пулăшăвне илнине пĕлтернĕ. Шăпах та çакă,  специалистсем пысăк профессионалсем пулнине çирĕплетет тенĕ вăл сăмаха малалла тăснă май.  

Аслă академикăн мăшăрĕ  Ирэн Федорова хăйĕн сăмахĕнче, юратнă мăшăрĕн ĕçне филиалта вăй хуракансем малалла тăснишĕн савăнса тав сăмахĕсем каланă.

Яланхиллех, мероприятинче хисепе тивĕçнисене патшалăх наградисене парса чысланă.

Юлашкинчен уява пухăннисем Святослав Федорова асăнса пуç тайнă, пулас ăрăва пысăк пĕлӳ парнеленĕшĕн ырланă.

Фоторепортаж