Оригинал

Авăн уйăхĕн 5-мĕшĕнче Чăваш Республикин Пуçлăхĕ Михаил Игнатьев «Отделфинстрой»   ТМЯО производствăн директорĕпе Алексей Мурыгинпа ĕçлĕ тĕлпулу ирттернĕ.

Ертӳçĕсем Шупашкарти микрорайонсене илемлетессипе çыхăннă ыйтусене тишкернĕ. Пурăнмалли çурт-йĕрсем таврашĕнче çак çӳлерех асăннă компани тивĕçлĕ объектсем хута янăшăн республика Пуçлăхĕ ырланă. «Радужный», «Премьер» тата «Олимп» проекчĕсем Шупашкартисем чи пысăккисем шутланаççĕ.  Вĕсен пĕтĕмĕшле калăпăшĕ 670 пин тăваткал метр йышăнать. Çурт-йĕре халăх хапăл тусах туянать тесе каланă вăл.

Алексей Мурыгин хăйĕн сăмахĕнче, вĕсен организацийĕ кăçал 25 пин тăваткал метр чухлĕ çур-йĕр хута янине пĕлтернĕ. 2017 çулта вĕсем планпа 35 пин тăваткал метр çурт хăпартса лартма палăртса хунă.  Кăтарту каламасăрах паллă, пĕлтĕрхинчен 10 пин тăваткал метр чухлĕ нумайрах. 2018 çул валли тата  та ытларах палăртма тĕллев лартаççĕ. «Отделфинстрой» ТМЯО производство директорĕ çĕнĕ проектсем пирки каласа кăтартнă. Хула таврашне тирпей-илем кӳртессипе çыхăннă ыйтăва халăхпа, вырăнти влаçпа тата строительство организацийĕн сĕнĕвĕсене тĕпе хурса пурнăçланине каланă.

Михаил Игнатьев мĕнпур ыйтусене татса парас ĕçе яланах витĕм кӳме хатĕррине пĕлтернĕ.  Çĕнĕ хута каякан районсен хăвăртрах аталанса вăй илсе пымаллине асăннă вăл сăмаха малалла тăснă май. «Халăх хăйсем пурăнакан вырăн таврашĕнче ача сачĕсене, шкулсене хута яма ыйтаççĕ. Пĕр сăмахпа каласан, инфратытăмĕн çирĕп «ура» çинче тăмалла», - тенĕ регион Ертӳçи. Кирек епле пуçаруллă ĕçре те яланах халăх сĕнĕвне шута илмеллине асăрхаттарнă вăл сăмаха пĕтĕмлетсе.  

Фоторепортаж