Чăваш Енри чи лайăххисенчен суйласа илнĕ вунă çамрăка Мускав Кремльне çар тивĕçĕсене пурнăçлама ăсатнă
Паян, чӳк уйăхĕн 15-мĕшĕнче Пĕтĕм Раҫҫейри призывниксен кунĕнче, Чăваш Енри чи лайăххисенчен суйласа илнĕ вунă çамрăка Мускав Кремльне çар тивĕçĕсене пурнăçлама ăсатнă. Çак ятпа Канашри сбор пунктĕнче савăнăçлă уяв иртнĕ.
Раççей Федерацийĕн Хурал службин Мускав Кремлĕн Комендатурин Президент полкĕнче служба тивĕçĕсене пурнăçлама хатĕрленекен яшсене Чăваш Республикин Министрсен Кабинечĕн Председателĕн ҫумĕ – Чăваш Республикин Пуҫлăхĕн Администрацийĕн Ертӳҫи Юрий Васильев саламланă. Регион Пуҫлăхĕн Михаил Игнатьевăн тав сăмахĕсене илсе ҫитернĕ, унăн ячĕпе тата хăй ятĕнчен ăнăçу, çирĕп сывлăх суннă.
Кăҫал кĕркуннехи тапхăрпа пĕтĕмпе Раҫҫей Федерацийĕн ҫар ретне тăма 1300 ҫынна палăртса хунă. «Мĕнпур яшсенчен вуннăшне ҫеҫ Раççей Федерацийĕн Хурал службин Мускав Кремлĕн Комендатурин Президент полкĕнче служба тивĕçĕсене пурнăçлама шаннă. Вĕсем ҫирĕп тĕрĕслев витĕр тухнă, пултаруллă та ăста яшсем», – палăртнă Юрий Васильев.
Республикăн ҫар комиссарĕ Александр Мокрушин пурне те чи малтан Пĕтĕм Раҫҫейри призывниксен кунĕ ячĕпе хĕрӳллĕн саламланă, ҫамрăксене тӳрĕ кăмăлпа Тăван ҫĕршыва хӳтĕлеме чĕнсе каланă.
Яланхиллех мероприятине ҫулталăк каялла Раҫҫей Федерацийĕн Хурал службин Мускав Кремлĕн Комендатурин Президент полкĕнче служба тивĕçĕсене пурнăçланă салтаксем хутшăннă. Вĕсем служба ĕҫĕсемпе паллаштарнă. «Чăваш Республикин чысне хӳтĕленĕ, яваплăха туйса таса чунпа Тăван ҫĕршывшăн тăрăшнă», – тенĕ салтаксем. Cалтак тивĕҫне пурнăҫланă яшсене, Чăваш Республикин Пуҫлăхĕн ятĕнчен асăнмаллăх алла ҫыхмалли сехет парса хисеп тунă, Юрий Васильев вĕсене Чăваш Ен ятне çӳлте тытнăшăн мухтаса тав тунă.
Чăваш Республикин Министрсен Кабинечĕн Председателĕн ҫумĕ – Чăваш Республикин Пуҫлăхĕн Администрацийĕн Ертӳҫи Юрий Васильев хăйĕн сăмахĕнче Чăваш Ен Правительстви ҫар тата патриотизм темисемпе курăмлă ĕҫленине, планпа килĕшӳллĕн мĕнпур мероприятисене вăхăтра йĕркелесе ирттернине пĕлтернĕ. Асăннă ыйту ҫине республика ертӳлĕхĕ пысăк тимлĕх уйăрнине каланă. Ҫамрăк ачасем спорта юратнине, салтак ретне тăма маларахри тапхăрсенчех хатĕрленсе пынине асăннă. «Кăҫал авăн уйăхĕнче Кадетсен корпусне хута янă. Унта 400 ача хăйсен ăсталăхне туптаса пырать. Пуласлăхра, шăпах та вĕсем ҫарпа ҫыхăннă аслă шкулсене вĕренме кĕме пултараҫҫĕ. Регионта «Зарница» тата «Орленок» ҫарпа патриотизм вăййисем кашни ҫул ҫӳллĕ шайра иртеҫҫĕ. Шанатпăр, ҫитĕнӳсем тата та пысăк пулассине», – тесе каланă вăл.
Ҫулсерен республикăра ҫар темисемпе ҫыхăннă 500 ытла мероприяти иртет, вĕсенче яшсемпе хĕрсем пĕтĕм кăмăлтан хутшăнаҫҫĕ.
Тăван ҫĕршывăн Аслă вăрҫин ветеранĕ Вячеслав Калинкин ҫамрăксене телейлĕ ҫул суннă, каялла сывă таврăнма пилленĕ.
Торжествăлла пулăма хутшăннисем ҫарта вилнисене асăнса шăплăха тытнă, кадетсем паттăр салтаксем палăк умне чечексем хунă.
