Чӳк уйăхĕн 16-мĕшĕнче Чăваш Республикин Министрсен Кабинечĕн Председателĕ Иван Моторин Муркашри чăх-чĕп фабрикине 50 ҫул ҫитнине халалласа ирттернĕ савăнăҫлă мероприятине хутшăннă, пухăннисене хĕрӳллĕн саламланă. Асăннă пулăма чăх-чĕп фабрикинче тăрăшакансем, производство ĕҫĕнче хисепе тивĕҫнĕ ветерансем, сумлă хăнасем – Правительство пайташĕсем, депутатсем, районти ял тăрăхĕсен ертӳҫисем пуҫтарăннă.

«Птицефабрика «Моргаушская» ОАО генеральнăй директорĕ Андриян Константинов предприятийĕн ĕҫĕ-хĕлĕпе паллаштарнă, сумлă ентешсем пирки каласа хăварнă, ҫитĕнӳсем ҫинчен чарăнса тăнă. Сăмах май, вĕсем Правительство ертӳлĕхĕпе пĕр-пĕринпе килĕшсе тухăҫлă ĕҫлесе пынине асăннă.  Вырăнти администраци, Чăваш Республикин Ял хуҫалăх министерстви пысăк витĕм кӳнине те каланă предприяти ертӳҫи.

«Организаци хăйĕн иртнĕ ҫур ĕмĕрне чаплă уяв пек кĕтсе илчĕ.  Ĕҫлекенсем малалла ăнтăлаҫҫĕ, ҫитĕнӳсем тăвассишĕн ырми-канми тăрăшаҫҫĕ», – палăртнă вăл.  

Чăваш Республикин Министрсен Кабинечĕн Председателĕ Иван Моторин мероприятине пухăннисене саламланă май, организаци пĕр тикĕс лайăх аталанса пырать тенĕ.  Вĕсен таварĕсене республикăра пурăнакансем кăна мар, регион тулашĕнче  те хапăл тусах йышăнаҫҫĕ палăртнă вăл.  Предприяти кулленех модернизациленсе пырать, пысăк технологи вăй илни никамшăн та вăрттăнлăх мар тенĕ Правительство Ертӳҫи, пурне те ырлăх-сывлăх, ҫитĕнӳсем суннă.   Палăртнă кун Иван Моторин пуҫтарăннă халăха Чăваш Республикин Пуҫлăхĕн Михаил Игнатьевăн Тав ҫырăвне вуласа панă.  «Мĕнпур тапхăрсенче предприяти пысăк ҫитĕнӳсемпе палăрса тăнă, ăста та пысăк тавра курăмлă ертӳҫĕсем ыттисемшĕн ырă тĕслĕх вырăнĕнче. Производствăра ĕҫлекенсем хăйсене шанса панă ĕҫе яваплăха туйса таса чунпа  пурнăҫлаҫҫĕ.  Чăваш Енри агропромышленноҫ комплексĕшĕн те ҫак асăннă организаци пысăк пĕлтерĕшлĕ.  Вĕсем ҫитĕнӳсемпе лăпланса лармаҫҫĕ, малаллах туртăнаҫҫĕ.  Производствăн калăпăшне ӳстерсе пырассишĕн ырми-канми вăй хураҫҫĕ. Шанатăп, ӳлĕмрен сирĕн тата та ăнăҫусем пулассине, халăха кирлĕ тавара калăпласа кăларассипе пысăк ҫитĕнӳсем пуласси те пĕрре те иккĕлентермест», – тенĕ тав ҫырăвĕнче.  

Яланхиллех хисепе тивĕҫнисене патшалăх наградисене парса хавхалантарнă.

Вăл кун ентешсене Раҫҫей Федерацийĕн Патшалăх Думин депутачĕ Николай Малов, Чăваш Республикин Патшалăх Канашĕн Председателĕн ҫумĕ  Александр Федотов, Чăваш Республикин ҫут ҫанталăк ресурсĕпе экологи министрĕ Александр Коршунов, Чăваш Республикин Патшалăх Канашĕн депутачĕ, агропромышленноҫ комплексĕпе экологи, экономика политикипе ĕҫлекен Комитетăн председателĕ Сергей Павлов, район администрацийĕн пуҫлăхĕ Ростислав Тимофеев ăшшăн саламланă.

  «Птицефабрика «Моргаушская» ОАО 1968 ҫулта йĕркеленнĕ. Паян предприяти малта пыраканнисенчен пĕри.  Пурĕ производство ĕҫĕнче 198 ҫын тăрăшать. Пĕтĕмпе предприяти территорийĕнче 18 цех шутланать. 2017-мĕш ҫулта чăх-чĕп фабрики пĕтĕмпе 126,6 млн ҫăмарта калăпласа кăларнă. Чăхсен шучĕ те ӳссех пырать, кăтарту 500 пинрен те иртсе кайнă.

Кăҫал кăрлач уйăхĕнчен пуҫласа юпа уйăхĕччен производство ĕҫне 32,2 млн инвестици хывнă, пĕлтĕрхинчен 2 хут та нумай пулни сисĕнет.  

Фоторепортаж