Чăваш Республикин Пуçлăхĕ Михаил Игнатьев Чӑваш чӗлхи кунӗ ячӗпе саламлани
Хаклӑ ентешӗмӗрсем!
Сире Чӑваш чӗлхи кунӗ ячӗпе чун-чӗререн саламлатӑп!
Чӗлхе халӑхӑмӑрӑн хаклӑран та хаклӑ пуянлӑхӗ, наци пӗрлӗхӗн символӗ шутланать.
Кӑҫал эпир чӑваш ҫырулӑхӗн аталанӑвне калама ҫук пысӑк тӳпе хывса хӑварнӑ паллӑ ҫутта кӑлараканӑмӑр Иван Яковлевич Яковлев ҫуралнӑранпа 170 ҫул ҫитнине паллӑ тӑватпӑр.
«Халӑх ӑс тӑнӗпе унӑн пӗтӗм тӗнче курӑмне тӑван чӗлхе чун парать. Тӑван чӗлхесӗр чӑн-чӑн пӗлӳ ҫук», – тесе палӑртнӑ аслӑ ҫутта кӑлараканӑмӑр.
Чӑваш Енре чӗлхемӗр ӑруран-ӑрӑва йӗркеллӗн куҫса пырассине тивӗҫтерме, граждансен ҫитӗнекен ӑрӑва пӗлӳ панӑ чухне чӗлхене ирӗклӗн суйласа илмелли правине пурнӑҫлама, ҫамрӑксене ырӑ кӳршӗлӗхе тата пирӗн нумай нациллӗ республикӑра пурӑнакан мӗнпур халӑхӑн чӗлхипе культурине хисеплеме вӗрентсе пӑхса ҫитӗнтерме пӗтӗм май пур.
Тӑван чӗлхене тирпейлӗн упрасси – тӗп тӗллевсенчен пӗри, ӑна пурнӑҫлас ӗҫе пирӗнтен кашнийӗнех хастарлӑн хутшӑнмалла.
Пурсӑра та ҫирӗп сывлӑхпа телей, ҫемье ырлӑхне, тӑнӑҫлӑхпа мӗнпур лайӑххине, савӑнӑҫ тата ӑнӑҫусем сунатӑп!
Чӑваш Республикин Пуҫлӑхӗ Михаил Игнатьев
