Ҫу уйăхĕн 18-мĕшĕнче Чăваш Республикин Пуҫлăхĕ Михаил Игнатьев Пĕтĕм Раҫҫей шайĕнче иртнĕ олимпиадăсен ҫĕнтерӳҫисемпе торжествăлла майпа тĕлпулу ирттернĕ.  Ҫамрăк яш-кĕрĕм 2017–2018-мĕш ҫулсенче тĕрлĕ конкурссенче хăйсен пысăк тавра курăмлăхне кăтартса мала тухнă.

Палăртса хăвармалла, Пĕтĕм Раҫҫей шайĕнчи ăмăртусем чăнласах та ачасен пĕлӳ шайне тĕрĕс палăртма витĕм кӳреҫҫĕ, вĕсен пуҫаруллă ĕҫĕсене асăрхама та май параҫҫĕ.  Ҫĕршыври чи анлă сарăлнă мероприятисенчен пĕри пулса тăччĕ тесен те йăнăш мар.  Ҫулсерен вуншар пин яш-кĕрĕм Чăваш Енрен хутшăнаҫҫĕ, вĕсем ҫак конкурссенче хутшăнса ăсталăхне кăтартса пама пултараҫҫĕ.

2017–2018-мĕш ҫулсенче пирĕн регионта пĕтĕмпе 53334 ҫын хутшăннă тĕрлĕ конкурссенче.  Ҫĕнтерӳҫĕсен ятне республикăри ăмăртусенче 383 ача ҫĕнсе илнĕ. 

Чи вăйлă та пултаруллă, ăста пысăк тавра курăмлă 58 ҫын Пĕтĕм Раҫҫейри ăмăртусенче хăйсен ăсталăхне кăтартса пама пултарнă.  Финал ăмăрту РФ территорийĕнче кăҫал пуш уйăхĕн 20-мĕшĕнчен пуҫласа ака уйăхĕн 29-мĕшĕччен пынă.

Пĕтĕмлетӳсем тăрăх, ҫакă паллă, пĕр ача Чăваш Енрен ҫĕнтерӳҫĕ ята тивĕҫнĕ, 20-мĕшĕ вара призерсем пулса тăнă Раҫҫей шайĕнче. 

Пултаруллă яш-кĕрĕме Чăваш Республикин Пуҫлăхĕ Михаил Игнатьев мухтаса чĕререн тухакан тав сăмахĕсем каланă. «Федераци шайĕнче иртекен ăмăртусенче хутшăнса эсир хăваăра ыттисемпе танлаштарма пултаратăр. Хатĕрленни сая кайман, ҫитĕнӳсем ҫав тери пысăк. Чăваш Енре вĕрентӳ тытăмĕ хăватлă пулнине РФ шайĕнче эсир ҫирĕплетсе патăр», – тенĕ регион Пуҫлăхĕ.  Сăмаха май, мала тухнисен йышĕнче гимназире, лицейре вĕренекенсем чылайăн пулнине асăннă. Вăл шутран ял тăрăхĕсенчен вĕренсе тухнисем те пур, ҫавă та пысăк пĕлтерĕшлĕ тенĕ сăмаха малалла тăснă май. «Олимпиада пĕтĕмлетĕвĕсем пирĕн республикăра чăнласах та вĕренӳ пайĕ ҫирĕп аталаннине кăтартса параҫҫĕ. Хулара анчах мар, ялсенче те ачасен пĕлĕвне аталантарса пыма условисем ҫителĕклĕ пулни куҫкĕретех», – тесе каланă регион Пуҫлăхĕ Михаил Игнатьев. Ҫĕнтерӳҫĕсене лăпланса ларма сĕнмен, малалла та ҫитĕнӳсем патне ăнтăлма чĕнсе каланă.  Тепĕр пысăк пĕлтерĕшлĕ ĕҫ пирки те чарăнса тăнă Ертӳҫĕ. Нумаях пулмасть РФ Президенчĕ ҫу уйăхĕнче ҫĕнĕ Указ кăларнă, унта та вĕрентӳ пайĕ тĕп тĕллевсенчен пĕри пулнине тепĕр хут аса илсе хăварнă. 

Чăваш Республикин вĕренӳ тата ҫамрăксен политикин министрĕ Александр Иванов хăйĕн сăмахĕнче, пирĕн республика РФ субъекчĕсем хушшинче чи ăнăҫлă аталанса пыракан вунă регион шутĕнче тăнине аса илнĕ. Ҫакă йăлана та кĕчĕ ĕнтĕ тенĕ министр сăмаха малалла тăснă май. Чăнласах та кашни ҫул пирĕн ентешсем олимпиадăсенче яланах пысăк ҫитĕнӳсемпе палăраҫҫĕ тенĕ. «Малашне сире валли ҫĕнĕ ҫул-йĕрсем уҫăлаҫҫĕ. Аслă шкулсене вĕренме кĕме те алăксем уҫă. Шанатăп, эсир пуласлăхра тата та пысăк ҫитĕнӳсем тăвассине, регион чапне ҫӳллĕрен те ҫӳле ҫĕклессине», – тенĕ сăмаха пĕтĕмлетсе министр.

Пĕр пухăннă пек чухне ҫамрăксем хăйсен шухăш-кăмăлĕпе паллаштарнă, хатĕрленӳ ĕҫĕсем пирки чарăнса тăнă. 

Шупашкарта 5-мĕш №-лĕ гимназире вĕренекен Никита Гущин хăйĕн сăмахĕнче, ҫитес ăмăртусене валли  ачасене хатĕрленме ҫак ҫĕнтерӳҫĕсене явăҫтарсан аван пулнă пулĕччĕ тенĕ.   Шкулта панă пĕлӳрен кăштах урăхларах форматсем пуррине палăртнă, ҫавăнпа та ҫак ĕҫе палăрнă ҫĕнтерӳҫĕсем питĕ лайăх чухлаҫҫĕ тенĕ, вĕсем тин ҫеҫ хутшăнма кăмăл тунисемшĕн усăллă пулассине палăртнă. «Эпир яланах ҫамрăсемпе тачă ҫыхăну тытма хатĕр, хамăр мĕн пĕлни пирки каласа кăтартма хавас», – тенĕ вăл.

Ку шухăшпа тĕлпулăва пухăннисем питĕ килĕшнĕ. Чăваш Республикин Пуҫлăхĕ хушнипе регионти Вĕренӳ тата ҫамрăксен политикин министерствине пултаруллă ачасен ăс-тăнне анлăлатса пыма витĕм кӳрекен центр хута ярасси те кун йĕркинчех.  Сăмаха май, Михаил Игнатьев ачасене кану лагерĕ бази ҫумĕнче йĕркелеме шут тытнă центр ятне мĕнле парасси пирки пурне те шухăшлама чĕнсе каланă.  

Шăмăршă тăрăхĕнчен килнĕ 11-мĕш класра вĕренекен Денис Ермолаев хăйĕн сăмахĕнче, Чăваш Ен спортпа туслă регион тесе палăртнă. Раҫҫей шайĕнче пирĕн республика ырă тĕслĕх шутĕнче тесе каланă ҫамрăк. Ҫакăн йышши ăмăртусем, пррнăҫра йывăрлăхсене парăнтарма вĕрентеҫҫĕ тенĕ вăл. Пурĕ спорт енĕпе пирĕн тăрăхран тăватă ача мала тухнă. Шупашкарти 44-мĕш лицейре вĕренекен 9-мĕш класс ачи Лидия Буракова биологи предмечĕ пирки чарăнса тăнă, ăна вăл питĕ килĕшнине хыпарланă. Мĕн ачаран ҫак предмета тĕпчесе вĕреннине каланă. Лидия хăйĕн ăсталăхне чылай туптанă, Сочи хулинче «Сириус» центрĕнче те сахал мар пĕлӳ пухнă.

ОБЖ предмечĕпе пирĕн регионтан 5 ача мала тухнă конкурссенче. Хулари 29-мĕш №-лĕ шкулта вĕренекен Ольга Константинова хăйĕн ăсталăхне пушар хуралĕнче сахал мар тĕрĕсленине асăннă, унти специалистсем пĕлӳ шайне ӳстерме витĕм кӳнине хыпарланă. 

Ҫак асăннă тĕлпулăва И.Н.Ульянов ячĕллĕ Чăваш патшалăх университечĕн ректорĕ Андрей Александров, И.Я.Яковлев ячĕллĕ Чăваш патшалăх педагогика университечĕн ректорĕ Владимир Иванов, Ял хуҫалăх академийĕн ректорĕ Андрей Макушев хутшăннă. Вĕсем аслă шкул пурнăҫĕпе паллаштарнă, ҫитĕнӳсем пирки чарăнса тăнă, хăйсем патне ҫамрăксене вĕренме пыма йыхравланă. 

Уҫă калаҫăва пĕтĕмлетнĕ май, Чăваш Республикин Пуҫлăхĕ Михаил Игнатьев ҫапларах каланă: «Сирĕн пуласлăх пысăк. Эсир Раҫҫей шайĕнче чапа тухнă. Эпир те сирĕнпе мăнаҫланатпăр. Ҫакна яланах асра тытма тăрăшăр, хăвăра хисепленине ăнланăр», – тенĕ.

Тĕлпулу ҫамрăксене Чăваш Республикин Вĕренӳ тата ҫамрăксен политикин министерствин тав ҫырăвĕсене панипе вĕҫленнĕ, яланхи пек яш-кĕрĕме Чăваш Республикин Пуҫлăхĕ хаваслă лару-тăрура парса чысланă. 

Фоторепортаж