Паян Чăваш Ен Пуҫлăхĕ Михаил Игнатьев кашни эрнере пулакан ĕҫлĕ планеркăна ирттернĕ. Яланхиллех унта Чăваш Республикин Министрсен Кабинечĕн членĕсем, федераци службисен регионти уйрăмĕсен ертӳҫисем пухăннă. 2018-мĕш ҫулта патшалăхăн пĕтĕмлетӳ аттестацийĕн ĕҫне епле хатĕрленсе ҫитни пирки кун йĕркине кĕртнĕ ыйтупа Чăваш Республикин вĕренӳ тата ҫамрăксен политикин министрĕ Александр Иванов тарăн доклад тунă.  Яланхиллех кăҫалхи экзамен та виҫĕ тапхăрпа пулĕ.   

2018-мĕш ҫулта пуш уйăхĕн 21-мĕшĕнчен пуҫласа ака уйăхĕн 11-мĕшĕччен патшалăхăн пĕрлехи экзаменне палăртнă тапхăртан маларах тытас текеннисем хăйсен пĕлĕвне кăтартса панă.  Экзаменсене ҫамрăксем Шупашкарти 48; 50-мĕш №-лĕ пĕтĕмĕшле вăтам пĕлӳ паракан шкулсенче тытнă.  Ытларах вĕсем пĕлтĕр шкултан вĕренсе тухнисем е тата ҫартан кĕркунне таврăннисем.  Пĕтĕмпе 271 ҫын регистрациленнĕ.  

Патшалăхăн пĕтĕмлетӳ аттестацине  ҫамрăк яш-кĕрĕмсенчен ытларах пайĕ ҫу уйăхĕн вĕҫĕнче тытасси паллă.  Палăртса хунă тăрăх, ҫу уйăхĕн 25-мĕшĕнче 9-мĕш класра вĕренекенсем хăйсен пĕлӳ шайне кăтартса парĕҫ.  Ҫу уйăхĕн 28-мĕшĕнче вара 11-мĕш класра вĕренекенсем экзамен планпа килĕшӳллĕн тытĕҫ.  Патшалăхăн пĕрлĕхлĕ экзаменне тытма пурĕ 5802 ҫын регистрациленнĕ, ОГЭ тытакансем вара 11754 –ăн пулĕҫ.   

2018-мĕш ҫулта пулакан ҫĕнĕлĕхсем: ППЭ тытас текенсен пĕтĕмĕшле материалсене скан витĕр кăларма тивĕ.  Кун пек ĕҫлесен, тĕрĕслевсене хăвăртлатма май пулĕ тесе хыпарланă министр. Палăртса хăвармалла, экзаменсем тытнă чухне пысăк технологиллĕ хатĕрсем тĕрĕслевсем ирттерме ҫителĕклĕ пуласси те куҫкĕретех.

11-мĕш класра вĕренекенсен экзаменне видеосăнав ҫирĕп тĕрĕслĕ, онлайн тытăмĕпе пĕтĕмпех курса пыма та май пуласси паллă. Аслă шкулсенче вĕренекен студентсем экзамен тытакансене сăнаса пырĕҫ, вĕсем йĕрке пăсасран асăрхĕҫ.

Чăваш Республикинчи Шалти ĕҫсен министерствин ĕҫченĕсем обществăлла вырăнта хăрушсăрлăхпа тивĕҫтерессишĕн тимлĕҫ. Пĕр сăмахпа каласан, экзамен вăхăтĕнче йĕрке туса пырĕҫ.

Пĕтĕм Раҫҫей шайĕнчи ППЭ ашшĕ-амăшĕсем тытаҫҫĕ акцине Чăваш Ен кăҫалхипе иккĕмĕш хут хутшăнать. «Ҫĕнтерӳ тума 100 балл» Пĕтĕм Раҫҫей акцине те Чăваш Ен хутшăннă. Экзаменсенче 100 балл пухнисем тин ҫеҫ тытма хатĕрленекен шкул ачисене хăйсен ăсталăхĕпе паллаштарма кăмăл тунă.

Енчен те 11-мĕш класра вĕренекенсем математикăпа та вырăс чĕлхипе  те экзаменсене тытаймасан, вĕсен  тепĕр хут 2018-мĕш ҫулта авăн уйăхĕн 4-15-мĕш кунĕсенче шанăҫ пур.

«Хатĕрленӳ ĕҫĕсене пĕтĕмпех йĕркелесе ҫитернĕ. Регион патшалăхăн пĕтĕмлетӳ аттестацине ирттерме хатĕр»,  – тесе хыпарланă Александр Иванов.

Чăваш Республикин Пуҫлăхĕ Михаил Игнатьев ҫĕнĕлĕхсем пирки ачасене, вĕсен ашшĕ-амăшĕсене вăхăтра пĕлтерсе пымаллине асăрхаттарнă.  «Патшалăхăн экзаменĕсене кашни ҫул регионта нимĕнле пăтăрмахсемсĕрех йĕркелесе ирттерсе янă. Кăҫал та кăтартăва чакарма юрамасть, пур ҫĕрте те йĕркелĕх хуҫаланмалла.  Ачасен кăткăс лару-тăрăва кĕрсе ӳкмелле мар, ҫĕнĕлĕхсем пирки туххăмрах ҫирĕп пĕлсе пымалла»,  – тесе сăмаха пĕтĕмлетнĕ регион Пуҫлăхĕ.