Чăваш Ен Чăваш Республикин спорт министрĕпе Сергей Шелтуковпа ĕмĕрлĕхех сывпуллашрĕ
Авăн уйăхĕн 13-мĕшĕнче Чăваш Республики патшалăхăн паллă деятелĕпе, Чăваш Республикин спорт министрĕпе Сергей Шелтуковпа сывпуллашнă.
Вăл йывӑр чире пула авăн уйăхĕн 11-мĕшĕнче пирĕнтен ĕмĕрлĕхех уйрăлса кайрӗ. Шупашкарта халăх паллă ентешĕ-мĕрпе Маунтинбайк центрĕнче сывпуллашнă.
Хурлӑхлӑ митинга Чăваш Республикин Пуҫлăхĕ Михаил Игнатьев, Министрсен Кабинечĕн членĕсем, федераци службисен регионти уйрăмĕсен ертӳҫисем, спорт тытăмĕнче тăрăшакансем тата ытти ҫынсем йышлӑн пуҫтарăннă.
«Чăваш Еншĕн ҫав тери пысăк ҫухату пулчĕ», – тенĕ Михаил Игнатьев хурлӑхлӑ митингра. Регион Пуҫлăхĕ Сергей Шелтуков тарăн пĕлӳ илнĕ ҫын пулнине, унăн спортри хăйне майлӑ ҫитĕнĕвĕ пуриншĕн те ырă тĕслĕх пулса тăнине ҫирĕплетнӗ. Ентешĕмĕр спорт аталанса пытăр тесе сахал мар тăрăшнине, мĕнпур ĕҫе яланах яваплăха туйса пурнăҫланине пӗлтернӗ вăл сăмаха малалла тăснă май. Чăваш Республикин спорт министрĕ пулнă май, пирĕн регионта унăн витĕмлĕхĕпе пĕтĕм Раҫҫей шайĕнче сахал мар курăмлă спорт мероприятийĕ иртнине те асăнса хăварнă Михаил Игнатьев.
Сергей Шелтуков тăрăшнипе Раҫҫейĕн пĕрлештернĕ спорт командинче те юратнă Чăваш Енĕн спортсменĕсем чылайăн. Республика ытти субъектсем хушшинче спорт енĕпе малти вырăнта тăрать. Спорта юратакансен йышĕ кулленех ӳссе пырать.
«Сергей Сильвестрович Шелтуков хăйĕн пурнăҫне спорта халалланă. Ырă чунлă ҫын пулнӑ май, вӑл ыттисемшĕн тĕслĕх вырăнĕнче. Министр тивĕҫне яваплăха туйса яланах пысăк шайра пурнăҫласа пынă. Сахал мар патшалăх наградине тивĕҫнĕ ентешĕмĕр. Пирĕн тĕллев – вăл пуҫарнă ĕҫсене малалла тăсасси», – тесе пĕтĕмлетнĕ хӑйӗн сӑмахне регион Пуҫлăхĕ.
Сергей Шелтуков министр пурнӑҫран вăхăтсăр уйрăлса кайнине асăнса Раҫҫейĕн тĕрлĕ кĕтесĕсенчен хурлӑхлӑ ҫырусем килсех тăраҫҫĕ.
Митингра Раҫҫей Федерацийĕн спорт министрĕн Павел Колобковӑн хурлӑхлӑ телеграммине вуласа панă. Сергей Шелтуков пултарулăхне тĕслĕх вырӑнне хунине, ентешӗмӗр спорта чунтан парăннине палӑртнӑ Раҫҫей спорт министрĕ. «Вӑл пурнăҫран вăхăтсăр уйрăлса кайни ҫывăх ҫыннисемшĕн те, пирĕншĕн те пысăк ҫухату. Унӑн сӑнарӗ пирĕн асăмăрта ӗмĕрлĕхех упранӗ», – тенĕ телеграммăра.
Митингра паллӑ ентешĕмĕрпе сывпуллашнӑ май ҫывăх тăванĕсем, вĕсемпе пĕрле Раҫҫей Спорт министерствин спорт резервне хатĕрлекен Федераци центрĕн директорĕ Константин Вырупаев, Пĕтĕм Раҫҫейри самбо федерацийĕн вице-президенчĕ Евгений Селиванов, Чăваш Республикинчи муниципалитетсен пĕрлӗхӗсен Канашӗн правленийĕн председателĕ Александр Куликов, Чăваш Республикин Патшалăх Канашĕн депутачĕ Сергей Мельников, Чăваш Енри йывăр атлетика федерацийӗн президенчĕ Геннадий Иванов, РСФСР тата СССР тава тивĕҫлĕ тренерĕ Михаил Кузнецов, Олимп вăййисен кĕмĕл пирзерĕ, СССР тава тивĕҫлĕ спорт мастерĕ Олимпиада Иванова хурланса сӑмах каланă.
Сергей Сильвестрович Шелтуков сӑнарӗ пирĕн асăмăртан нихӑҫан та тухмĕ, ӑна эпир яланах чĕрере упрăпăр.
Паян Шупашкарта Таса Татиана Православи чиркĕвĕнче сумлӑ ентешӗмӗре асăнса кĕлĕ ирттернӗ.
