Чăваш Республикин Пуçлăхĕ Михаил Игнатьев Нефтьпе газ промышленноҫӗн ӗҫченӗсен кунӗ ячӗпе саламлани
Нефтьпе газ промышленноҫӗн хисеплӗ ӗҫченӗсем тата ветеранӗсем!
Сире професси уявӗ ячӗпе чун-чӗререн саламлатӑп!
Нефтьпе газ отраслӗн ӗҫченӗсем республика аталанӑвне пысӑк тӳпе хываҫҫӗ тата пӗлтерӗшлӗ чылай тӗллеве пурнӑҫлама пулӑшаҫҫӗ. Чӑваш Енре газ хуҫалӑхӗн объекчӗсене ҫулсерен ҫӗнетеҫҫӗ тата ҫӗнӗрен туса лартаҫҫӗ, «кӑвак ҫулӑмпа» усӑ курнӑ чухнехи экономикӑпа экологи тухӑҫлӑхне ӳстермелли ҫӗнӗ технологисемпе оборудованисене ӗҫе кӗртеҫҫӗ.
Раҫҫей Федерацийӗн регионӗсене газ кӗртмелли программа шайӗнче «Газпром регионсен хушшинчи газ» тулли мар яваплӑ общество республикӑшӑн пӗлтерӗшлӗ проекта – Атӑл леш енне газ илсе ҫитерес ӗҫе пурнӑҫлама тытӑнчӗ.
Чӑваш Ен нефте трубопроводсем тӑрӑх куҫарас сферӑри тӗп профессисем валли кадрсем хатӗрлекен центр шутланать. «Транснефть» АК» акционерсен уҫӑ обществин тытӑмӗнчи вӗренӳ учрежденийӗ шутланакан Канашри транспортпа энергетика техникумӗ Раҫҫейӗн мӗнпур регионӗ валли кирлӗ специалистсем вӗрентсе кӑларать.
Нефтяниксемпе газ отраслӗнче вӑй хуракансем республикӑри хуласемпе районсен пурнӑҫне хастарлӑн хутшӑнаҫҫӗ, культурӑпа наукӑна, вӗренӗве тата спорта аталантарма пулӑшаҫҫӗ.
Нефтьпе газ комплексӗн ӗҫченӗсен яваплӑхӗпе професси ӑсталӑхӗ Чӑваш Енӗн промышленноҫ объекчӗсемпе социаллӑ учрежденийӗсене энергипе шанчӑклӑн та пӗр кӑлтӑксӑр тивӗҫтерессине ҫирӗппӗн шанса тӑма май параҫҫӗ.
Хисеплӗ нефтяниксемпе газ отраслӗн ӗҫченӗсем! Эсир пирӗн килсене ҫутӑпа тата ӑшӑпа тивӗҫтеретӗр, эппин, сирӗн ҫемье вучахӗ те яланах хӗрӳ пултӑр, ҫывӑх ҫыннӑрсемпе тӑванӑрсен юратӑвӗ тата пулӑшӑвӗ сире Чӑваш Енпе Раҫҫей ырлӑхӗшӗн ҫӗнӗ ҫитӗнӳсем тума хавхалантарса тӑччӑр!
Хӑйӗн пурнӑҫне нефтьпе газ промышленноҫӗпе ҫыхӑнтарнӑ пӗтӗм ҫынна ҫирӗп сывлӑх, тӑнӑҫлӑхпа ырлӑх тата мӗнпур лайӑххине сунатӑп!
Чӑваш Республикин Пуҫлӑхӗ Михаил Игнатьев