Чăваш Республикин Пуçлăхĕ Михаил Игнатьев Машинӑсем тӑвакан отраслӗн ӗҫченӗсен кунӗ ячӗпе саламлани
Машинӑсем тӑвакан отраслӗн хисеплӗ ӗҫченӗсем тата ветеранӗсем!
Професси уявӗ ячӗпе чун-чӗререн саламланине йышӑнсамӑр!
Машиностроени комплексӗ республикӑн промышленноҫӗпе экономикин тӗп пайӗ пулса тӑрать. Ӑна тивӗҫлипе аталантарма эпир лайӑх хутлӑх йӗркелетпӗр, ҫӗнӗ производствӑсене вырнаҫтарма комплекслӑ инфратытӑм тӑватпӑр.
Чӑваш Республикин Промышленноҫа тата инвестици ӗҫ-хӗлне аталантаракан фончӗн майӗсемпе усӑ курса машиностроени сферинче чылай проекта пурнӑҫланма тытӑннӑ та ӗнтӗ.
Отрасль предприятийӗсем паян хастарлӑн аталанаҫҫӗ, производство хӑвачӗсене ҫӗнетеҫҫӗ, ку чухнехи технологисене ӗҫе кӗртеҫҫӗ, инвестици проекчӗсене пурнӑҫлаҫҫӗ, ӗҫри ҫӗнӗ майсене алла илеҫҫӗ.
Чӑваш Ен машиностроителӗсен импорта улӑштаракан пысӑк технологиллӗ таварӗсене вырнаҫтармалли рынок ӑнӑҫлӑн анлӑланса пырать, асӑннӑ продукцисем халӑх валли таварсем туса кӑларас ӗҫре кӑна мар, ҫӗршывӑн ҫарпа промышленноҫ комплексне те питех те кирлӗ.
Машиностроени предприятийӗсен продукцийӗн пахалӑхӗпе шанчӑклӑхне рабочисен тата инженерипе техника персоналӗн нумай пинлӗ туслӑ коллективӗ хӑйӗн пултаруллӑ та пысӑк яваплӑхлӑ ӗҫӗпе тивӗҫтерет.
Сире тӑрӑшуллӑ ӗҫӗршӗн, профессие чунтан парӑннӑшӑн тав тӑватӑп.
Пурсӑра та ҫирӗп сывлӑх, ырлӑх тата ӗҫре ҫӗнӗ ҫитӗнӳсем сунатӑп!
Чӑваш Республикин Пуҫлӑхӗ Михаил Игнатьев