Юпа уйăхĕн 24-мĕшĕнче Чăваш Республикин Пуҫлăхĕ Михаил Игнатьев Канаш хулинче ĕҫлĕ ҫул ҫӳревпе пулнă май, Индустри паркне ҫитсе килнĕ, объектсене пăхса тухнă.

Хальхи вăхăтра паркра электричествăпа шывпа тата газпа туллин тивĕҫтернĕ.  Иртнĕ ҫул вĕҫĕнче Индустри паркне илсе пыракан «Аниш» ҫĕнĕ автоҫула хута янă пулнă.  Палăртмалла, вăл ҫул Индустри паркне А-151 федераци ҫулĕпе пĕрлештерет.  Палăртнă территоринче пуҫласа  «Аркто» тулли мар яваплă общество хăйĕн производствине уҫма хатĕрленет. Предприяти таварсене шăнтса хатĕрлеме холодильник таврашне тирпейлессипе ĕҫлеме тĕллев лартнă.   

Организацийĕн директорĕ Светлана Ардентова производствăн планĕпе паллаштарнă,   корпусăн пĕтĕмĕшле лаптăкĕ 14 пин тăваткал метр йышăннине хыпарланă республика Пуҫлăхне. Объекта ҫĕклеме инвестор пурĕ 600 млн яхăн тăкакланă. Пĕтĕмпех пурнăҫа кĕрсен халăх валли ҫĕнĕ 60 вырăн хатĕрленĕ. Иккĕмĕш тапхăрпа пулса пыракан ĕҫсене туллин пурнăҫласан вара,  пурĕ 120 ĕҫ вырăнĕ пуласси те куҫкĕретех тенĕ ертӳҫĕ. Ҫĕнĕ ҫулта производствăна пурнăҫа кĕртме тĕллев лартнă предприятие ертсе пыракансем.  

«Ушкăна пĕрле ҫав тери туслă та килĕшӳллĕ ĕҫленĕ. Республикăри, вырăнти хăй тытăмлăх органĕнче тăрăшакан чиновниксем сахал мар витĕм кӳчĕҫ. Пĕр сăмахпа каласан, пĕр-пĕринпе тухăҫлă ĕҫлесе пытăмăр. Ака уйăхĕнче специалистсене хатĕрлесе ҫитерĕпĕр, вара таварсене калăплас ĕҫе пуҫăнăпăр», - тенĕ Светлана Ардентова.  

«Аркто» фирма ҫитес вăхăтрах ҫĕнĕ производство уҫма хатĕрленнишĕн пурсăмăрăн та мăнаҫланмалла.  Юлашки виҫĕ ҫул хушшинче Индустри паркне пурĕ 1 млрд 415 млн тăкакланă.  Пуласлăхра вăл территоринче 8 предприяти уҫăласси те куҫкĕретех», -  тенĕ регион Пуҫлăхĕ.  

«Эпир хамăр енчен мĕн шантарнине туллин пурнăҫларăмăр. Инфратытăма ҫĕнетсе юсарăмăр.  Монохуласене аталантарассипе ĕҫлекен Фондпа пĕрле килĕшсе, мĕнпур ыйтусене вăхăтра татса панă. Хĕлле объектсене тума ҫăмăлах мар, ҫавăнпа та ҫитес ҫул валли пурнăҫа кĕртме плана кĕртсе хăварнă», – тесе хыпарланă регион Ертӳҫи.

Мĕнпур ĕҫсем пĕтĕмпех ҫирĕплетнĕ графикпа килĕшӳллĕн пулса пыраҫҫĕ. «Хăш-пĕр йывăрлăхсем сиксе тухрĕҫ, вĕсене пурне те уҫăмлатнă. Бюджетран куҫакан укҫа тĕллевлĕн тăкакланать. Ҫĕнĕ производствăсем уҫăлсан, граждансем валли ĕҫ вырăнĕсем тупăнаҫҫĕ.    Тепĕр тесен, бюджета та сахал мар укҫа кĕрет.  Ыйтусем пĕтĕмпех пысăк пĕлтерĕшлĕ», - тесе сăмаха пĕтĕмлетнĕ Михаил Игнатьев. 

Фоторепортаж